May angay pa’ng usbon

Nindot ang gihimo ni Mayor Michael Rama nga wala na pasudli og mga sakyanan ang kabahin sa dalan D. Jakosalem, M.C. Briones ug P. Burgos kay luwas na sa peligro ang mga manimba nga dili madam-agan sa sakyanan.

Apan duna’y gamay nga angay’ng himoan og kausaban. Kay ang pagsirado molungtad pa man sa Domingo, mas higayon pa nga kahimoan og lakang aron makatabang pagpamenus sa problema sa trapiko.

Wala na pasudla ang mga sakyanan gikan pa sa eskena Magallanes ug F. Gonzalez kay mao man kini ang karsada nga molusot sa D. Jakosalem. Angay nga ang mubo nga kabahin sa Magallanes gikan sa eskena F. Gonzalez paparkingan na lang og mga sakyanan.

Ingon usab niini ang angay’ng himuon sa mubo nga bahin sa dalan Magallanes ug Lapu-Lapu Street nga wala na pasudli og sakyanan. Mahimo kini nga paparkingan aron maiban-ibanan ang problema.

Ang kabahin usab sa Osmeña Boulevard gikan sa eskena Lapu-Lapu Street paingon sa eskena P. Burgos mahimo nga paparkingan og mga sakyanan.

Kun gamiton isip mga parking area ang mga mugbo nga bahin sa karsada kaparkingan kini og subra sa 100 ka sakyanan. Dili ba makatabang na kini pagsulbad sa problema sa trapiko?

* * *

Nindot kay ang kadagkoan sa simbahan ug dakbayan sa Sugbo may giplano na nga rota aron adto mosubay ang solemn procession sa imahen ni Santo Niño kun mahitabo nga mag-uwan ug makamugna og paglunop karong Sabado.

Gibana-bana man gud sa weather bureau nga mag-uwan karong Sabado o kaha Domingo tungod sa tropical depression Amang nga naghilom-hilom lang paingon dinhi sa Kabisay-an.

Maayo unta og madala’g ampo sa katawhan ug dili na mahinayon ang pag-abot sa dautang panahon. Kun madag-umon lang ang kalangitan, mas malipay niini ang mga mosalmot sa prosesyon kay bugnaw man.

Usa ra ba ko sa moapil sa prosesyon. Saaran nako nga matag tuig g’yud maglakaw ko kuyog sa prosesyon ug ibaliwala lang nako ang uwan, kun adunay uwan.

Duna ko’y kaagi sa akong kinabuhi nga subli nako nga isaysay na usab aron sa pagmatuod sa kagamhanan ni Santo Niño. Utang nako ni Santo Niño ang akong kinabuhi karon.

Siya pa g’yud ang kanunay nga motabang kanako. Hapit tanan sa akong mga gipangayo kaniya iya g’yud nga gihatag. Kauban nako siya kanunay bisan asa ko paingon.