EDITORYAL - Maayong pag-abot Pope Francis

Human sa kapin usa ka tuig nga paghinamhinam sa mga Filipino, moabot na g’yud karong adlawa si Pope Francis,    ang Santo Papa nga gibansagang the “People’s Pope” niadtong tuig 2013.

Ang Argentinong Santo Papa naila sa iyang pagkamapahiubsanon ug ang simple niyang kinabuhi hangtud sa pagkapili kaniya nga mamahimong lider sa kapin usa ka bilyon nga Romano Katoliko sa kalibotan.

Si Pope Francis maoy kanhi cardinal ug Arsobispo sa Buenos Aires sa nasud sa Argentina kansang binunyagang pangalan mao si Jorge Mario Bergoglio.

Naila siya sa iyang pagkasimple didto sa Buenos Aires mao nga wala na ikatingala kun nganong siya maoy napili sa College of Cardinals atol sa gihimong conclave duha ka tuig na ang nakalabay sa Sistine Chapel sa Vatican, isip hulip sa mi-resign nga si Pope Emeritus Benedict XVII. Sakop siya sa Hesuitang grupo sa mga pari nga nagsunod sa yanong kinabuhi ni St. Francis Xavier, siya maoy labing unang Santo Papa nga dili gikan sa Uropa.

Daghan siyang makapakurat  nga mga pamahayag nga dunay pagkasukwahi sa baruganan sa kadaghanan sa nangaging mga Santo Papa sama sa aborsyon, sa mga bayot ug tomboy ug ingon man ang kabahin sa bunga sa premarital sex ug kadtong nagkabuwag sa kaminyoon.

Ang tubag sa Santo Papa kabahin niini simple apan dunay bug-at nga kahulogan, way perpekto, dili siya maoy mohukom kanila ug angayan silang dawaton sa Simbahan aron sila mabalik sa sabakan niini. Ang Pilipinas maisip nga ‘bulawan’ sa Vatican dinhi sa Asya nga gidominar og nagkalain-laing mga relihiyon sama sa Islam, Buddhism ug uban pang Christian religions nga dili iya sa Romano Katoliko.

Ang 80 porsiyento sa kapin usa ka milyon nga populasyon sa Pilipinas mga Romano Katoliko ug giisip kini nga ‘puno-puno’ sa nagkahinay nang impluwensiya sa Vatican sa Uropa ug sa Amerika.