Dili man maka-masa

Nahulma ang usa ka hugpong sa mga indibidwal gikan sa nagkadaiyang sektor, propesyon o trabaho aron mahimong aktibong tigduso og mga maayong gawi diha sa karsada iyawat maluag-luagan ang nagkahuot nang trapiko sa dakbayan sa Sugbo.

Ang grupo nagduso niini #GiveWayTaBai nga konsepto sa pag-promote sa gitawag og "road protocol" nunot sa paglingkod sa bag-ong direktor sa Cebu City Traffic Operations and Management nga si Victor Caindec. Daghan ang midayeg kang Caindec tungod sa iyang propesyonal ug praktikal nga approach sa pagsulbad sa trapiko sa dakbayan. Ug natayming ang paglingkod ni Caindec sa Citom nga gisaulog ang Sinulog 2015, diin ang kadalanan sa siyudad maghuot gyud sa trapiko.

Sa pagsugod pa lang, ang pamaagi sa kampanya nga #GiveWayTaBai gisentro sa mga motorista nga anaa sa Facebook ug Twitter. Sa sinugdanan, nakaingon ko nga dili mosaler kining kampanyaha kay ang mga anaa sa social media mga responsable nga drayber man.

Ug gani, nakahunahuna ko nga gituyo kini sa administrasyon ni Mayor Mike Rama nga ingon niini ang  kampanya tungod kay ang reklamo sa kahuot na sa trapiko sa siyudad anaa man mag-ulan sa Facebook ug Twitter. Apan alang kanako, ang maayong rombohon niining kampanyaha mao ang mga drayber sa PUJ ug taxi kay hilabihang kabadlongon niining mga draybera, wala’y respeto sa balaod sa trapiko, ug wala’y kahadlok nga madakpan sa kanunay.

Kun ang kampanya dinhi lamang sa siyudad, dili kita makakita og tinuoray'ng sulbad kay ang problema sa trapiko nanganaykanay naman sa silingang mga siyudad ug lungsod sa Metro Cebu.

* * *

Wala na gyud makabawi ang survey rating ni Bise Pres. Jejomar Binay nga nagsugod sa pagsawom niadtong Nobiyembre kanus-a na-expose ang iyang pangawkaw sa Makati, pagpanag-iya og mga kabtangan bisan wala’y negosyo iyang pamilya.

Sa resulta sa fourth quarter Social Weather Station survey, ang net rating ni Binay mitibugsok ngadto sa "good" +44 gikan sa naandan niyang "very good" +52 nga score sa ikatulong kuwarter sa 2014.

Sa ato pa, wala gyud diay makauyon ang mga Pilipino sa iyang pag-ikyas-ikyas sa Senado nga nag-imbestigar sa iyang mga kaso.

Karong bag-o, tubagonon ni Binay ang binilyon nga pundo sa Pag-Ibig nga giingong nahanaw. Dili siya maka-eskapo niini tungod kay ang rekod makasulti man.

Kanang paglihaylihay ni Binay sa Senate inquiry iyang gisunod si Erap Estrada kaniadto nga inay moatubang sa imbestigasyon tungod sa pagdawat niya og salapi gikan sa jueteng, miadto siya sa mga tawo (masa) ug nakigpangaon og bodol-bodol.

Apan si Erap man to, si Binay lahi man tungod kay dili man siya maka-masa.