Gipugngan sa pagbakasyon

Dear Atty. Divine,

Duna ko’y pangutana bahin sa katungod namo’ng mga katabang. Nagplano man gud ko nga mokuyog sa akong boyfriend sa ilang probinsya kay iya ko’ng ipailaila sa iyang parents. Ang akong problema ang akong amo kay di mosugot kun molarga ko. Duna ba sila’y katungod nga mopugong kanako? Masuko ‘sab ang akong amo kun mag-uyab-uyab ko. Duna ba diay sila’y katungod nga manghilabot sa akong personal nga kinabuhi? Unsa may maayo nako nga buhaton kun di mosugot ang akong amo kun mobakasyon ko bisan usa ka semana?- Shella

Dear Shella,

Kun ikaw nagserbisyo sa imong amo isip domestic helper sud na sa usa ka tuig, duna kay katungod nga mopahimu’s sa lima ka adlaw nga Service Incentive Leave base sa Domestic Worker's  Act kon Kasambahay Law. Busa mas maayo nga mopahimu’s ka niini ug mao kini imong gamiton sa paglarga sa probinsya kauban ang imong boyfriend. Kinahanglan nga pahibaw-on nimo daan ang imong amo aron makapangandam ‘sab sila samtang wala ka. Kun wa pa ka kaabot og one year sa serbisyo then hangyuon lang g’yud nimo ang imong amo ug kinahanglan nga duna kay laing balido nga rason aron ka tugutan. Mahimo ‘sab nga imong tingbon ang imong rest day, inay mag day off ka og once a week imo nalang ni nga tingubon nga dili ka mo day off sud sa usa ka buwan or 2 months aron tugutan ka nga makabakasyon ug mao ni hulip sa mga adlaw nga ikaw mobakasyon. Samtang kalabot sa imong pag-uyab-uyab, way katungod ang imong amo nga manghilabot sa imong personal nga kinabuhi basta wa lang kini makaapekto sa imong trabaho. Thanks and Pit Senyor. - Atty. Divine