Tawhanong pakigsuod

Adunay mga tawo nga daghang nahigala o naamigo apan di mahilig makig-suod. Mao lay palabihon nga maghuwat la’g unhan kun dunay mosangpit niya. Unya igo lang moikog dili makigtubay. Malaya ang atong kinabuhi kun ingon niini ang atong pagkatawo. Daghang oportunidad ang mangawala, tungod lang sa dili nato paghangop sa kabililhon sa tawhanong pakigsuod sa isig katawo.

Unsa may buhaton aron epektibo kita nga makigsuod? Tamdan nato kining mga giya nga maghatag og nindot nga kinabuhi kun ato na kining himuong gawi;

* Makighinabi sa mga tawo – Wala’y sama kaanindot paminawon ang mga maayong pulong nga mabination sa pagtagad o sa paghimamat.

*  Mapahiyumon sa mga tawo – Makapa-impres kini og kagaan sa buot nga batyagon ang kabubut-on sa pagbinatiay.

*Atong tawgon ang tawo sa iyang ngalan—  Kay wa sama kaanindot paminawon kun madungog ang iyang ngalan. Mora’g motingkad dayon ang dalunggan sa kahinangop.

* Mahigalaon sa pagpakabana – Pakighigala nga magsinuoray.

* Mainiton sa pagbinatiay– Tinuoray nga matinud-anon sa pakiglambigit isip managhigala.

* Magmatinud-anon nga interesado ka sa mga tawo– Aron maugmad ang kompiyansa o pagsalig.

* Makigdaiton sa pagdayeg – Mabinantayon sa makasilo nga pagsaway o sa positibong komentaryo.

* Masinabuton sa pagbati sa uban – Kay simpatiya kini sa pakig-unong.

* Maantigong maminaw sa opinion sa uban–Tulo ka habig sa panagsumpaki nga angay mo ikonsiderar,  ikaw, siya ug ang uban.

* Maabtikon sa paghatag og serbisyo — kinabubut-on nga malipayon sa pag-alagad.