Importer ug konsehal nagkuyog sa Macau

Binilyon ang nahanaw gikan sa duties and taxes sa mga ininsik ug Taiwanse nga mga produkto nga nanulod dinhi sa Sugbo nga wala magtarong og agi sa proseso sa Bureau of Customs.

Apan nagpabilin kining wala mautingkay tungod sa impluwensiya sa usa ka Filipino-Chinese nga negosyante nga maoy giilang ‘importer’ og mga produktong Taiwanese.

Kadaghanan niining mga produktoha wala mag-agi og inspeksiyon sa Bureau of Product Standard (BPS) sa Department of Trade and Industry (DTI) apan padayon gihapon ang pag-display niini sa mga Taiwanese store. Ang makaluluoy mao ang mga mamalitay niining mga produkto nga dili magdugay tungod sa ka-ubos sa kalidad.

Ang importer niining mga Taiwanese product maoy tag-iya niadtong night bar sa reclamation area nga gipasirad-an sa mga awtoridad tungod kay nagpasayaw og mga babayeng hubo.

Bisan sa mando nga sirado kini, misuway og abli og balik tungod sa pagdupadupa sa usa ka konsehal sa siyudad sa Sugbo nga giilang suod nga higala ug nagsilbeng protektor niining negosyante. Gani, ang konsehal ug ang negosyante nagkakuyog man sa pagtan-aw sa katapusang fight sa boksing ni people’s champ Manny Pacquiao didto sa Macau. Tag-ana kinsay nagplete sa konsehal?

Nagtuo ko nga ang impluwensiya niining Mr. S. abot sa Manila, dayag sa paglusot sa iyang mga kargamento nga wala mag-agi og kuti-kuti sa customs.

* * *

Motunga kaha si Pres. Noynoy Aquino sa Sugbo aron pagsaulog sa Sinulog 2015?

Si Mayor Mike Rama miimbitar kang Aquino ug ni Bise Pres. Jejomar Binay aron pagsaulog sa Sinulog. Apan daan nang nagtuo si Mike nga posibleng wala’y mosipot sanglit moanhi man si Pope Francis atol sa adlaw sa Sinulog aron pagduaw sa mga biktima ni bagyong Yolanda.

Kaniadto pa nga gisaway ang kagamhanan sa dakbayan sa ilang pagpagamit sa kasaulogan sa Sinulog pagpasikat sa mga politiko pinaagi sa pagpasaka kanila sa Cebu City Sports Center grandstand.

Karon nga wala na kahimut-i ang pagpasikat sa mga politiko diha sa mga relihiyosong kalihukan ug sa mga kalihukan nga ginastohan sa kuwarta sa katawhan, angay untang likayan na sa kagamhanan sa siyudad ang pagpagamit sa Sinulog pagpasikat sa ilang mga political patron gikan sa Manila.

Mao man gani nga ang mga tawo motawag dayon niining ilang kaway-kaway sa kamot ug panglamano sa mga tawo nga “epal.”  Apan ang kagamhanan sa siyudad, ilabi na ang Sinulog Foundation, wala pa gyud makat-on.

Dugay na nga gikawat sa kagamhanan ang kapistahan ni Sr. Sto. Niño nga puro relihiyoso ug nahimong komersiyal. Pun-an pa ang pagbukas niini sa mga epal nga politiko.