EDITORYAL – Pletehan kunhod na
Dia sa Sugbo karong adlawa si Winston Ginez nga maoy tsirman sa Land Transportation Franchising and Regulatory Board (LTFRB). Bisan og naunhan si Ginez sa iyang LTFRB-7 regional direktor, apan pormal niya nga ipahibalo ang pagpakunhod na sa pletehan sugod karon.
Sugod karong adlawa, ‘tag P7 na lang ang minimum nga pletehan sa mga passenger jeepney. Unya kun mga tinun-an, senior citizens ug mga tawo nga adunay apan sa panglawas ang mosakay, P5.60 ra ang pletehan nga angay pangayuon sa mga drayber.
Sa katapusan putol na ang “kaligayahan” sa mga drayber og PUJ nga sa taud-taud nga katuigan nangolekta og subra’ng plete gikan sa ilang mga pasahero. Nakatigum sila og dugang 50 sentimos sa matag pasahero kay samtang P7.50 ra ang plete, P8 man ang ilang kolektahon.
Ang LTFRB angay g’yud unta nga mopatuman og minimum nga pletehan nga dili bungkig og 50 sentimos aron sayon ra sa mga pasahero ang pagplete ug dili makarason ang mga drayber nga dili makapanukli.
Sa barato na kaayo nga presyo sa gasolina pagka karon, wala na’y rason ang mga drayber nga magbagutbot kun pakubsan ang pletehan.
- Latest
