Health habits sa mga Pinoy

Sa usa ka survey nga gihimo sa mga nasud sa Vietnam, Thailand, China, Malaysia, Singapore, Hong Kong ug Pilipinas, nakita nga ang atong nasud, kita’ng mga Pinoy, “have the worst unhealthy eating habits,” ug “the least number of sleeping hours a day.”

Sa ato pa, pasagad lang ta’g kaon, sa wala’y pagtagad kun unsa ang epekto niini nganhi sa atong lawas. Mao nga kun magtapad ang kamunggay ug lechon o humba, way molingi sa kamunggay.

Ug, ambut ngano, mag-unsa ta magabii, kuwang ta sa katulog. Kasagaran di muabot og unom ka oras ang pagkatulog.

Dugang niini, dali ra ta’ng ma-stress, ug wala kanato ang regular nga pag-exercise. Tulo ka paborito’ng rason o excuse ngano nga wala nato ma-habit ang pag-exercise:

1) Wala’y igo’ng panahon gumikan sa trabaho (ambot unsay trabaho).

2)  Distraction, o pagkabalda gumikan sa television, internet (sa ato pa, atong palabihon nga magyampungad sa computer ug sa television tibuok adlaw, kay sa mag-exercise), ug

3) Kulang sa kadasig ug kaikag pag-exercise, or lack of personal motivation. Mahimo nga atong dugangan og ikaupat: ang atong pagkatapulan.

On the other hand, samtang nasayod kita niini’ng maong mga problema sa panglawas, gani, optimistic kaayo kita nga ato da kini’ng masagubang, apan, wala kita’y gihimo pag-address o pag-atubang niini.

* * *

Niay kataw-anan nga nahitabo sa duha ka kawatan didto sa Orlando sa America. Nag-akyat bahay sila. Ilang nadala mga electronic equipment, alahas ug usa ka “urn” ug laing container.

Pag-uli nila sa ila, ilang giyupyop ang sulod sa “urn” ug sa laing container, uban sa pagtuo nga cocaine o heroin ang sulod niini.

Ang sulod sa “urn” - abu sa gi-cremate nga tawo. Ang sulod sa laing container: abu usab sa gi-cremate nga duha ka iro, mga Great Danes (hasta diay mga iro didto sa America i-cremate pud. Ngiga nila no?

* * *

Kun mahimo na’ng balaud ang House Bill 4433 nga mag-amend sa Consumer Act of the Philippines, ang mga tindahan, ang mga mall, silotan na kun dili mosukli sa husto’ng kantidad ngadto sa ilang mga customer. Usahay suklian lang ta’g candy nga baratuhon. Supak na unya ni sa balaud.

Ambot ngano nga dili man sila mag-andam og sensiyo, aron di mahasol ang ilang mga customer nga kun buot huna-hunaon, maoy nagbuhi kanila, maoy naghatag kanila’g dako’ng ganansiya.