Ang eksperimento sa DOH

Karon pa kita masayod kay wala man ta tug-ani sa Department of Health (DOH) nga nag-eksperimento diay ang ilang buhatan og tambal sa dengue.

Labing seguro nahagbong mo sa inyo’ng gilingkoran diha nga nasayran ninyo nga 200 diay ka bata ang gieksperimentohan sa DOH sa unom ka tambalanan lukop nasud nga ang mga ginikanan gipapirma og kasabotan.

Ang eksperimento gimando ug gitugot sa miluwat na sa katungdanan nga si Secretary Enrique Ona. Kun wa ko masayop, si Secretary Ona ang una nga mihimo niini dinhi sa Pilipinas.

Ang World Health Organization mipahunong sa eksperimento ni secretary Ona tungod sa ka peligro niini ug human usab mangreklamo ang ginikanan sa mga bata.

Ambot unsay rason ngano’ng maoy misantop sa huna-huna ni Ona ang pag-eksperimento sa mga bata? Dili ba kaha kini bunga sa iyang pagka desperado tungod sa kapakyas sa iyang buhatan pagsumpo sa kaso sa dengue nga mikalas og daghang kinabuhi?

Dili ba kaha kini bunga sa iyang kalagot sa lamok nga bisan og mananap wa g’yud siya makapilde niini.

Pero sa kadaghan nga puwede nga eksperimentohan ni Ona, ang mga bata pa g’yud ang iyang napilian? Kun ang mga siyentipiko migamit sa mga mananap alang sa ilang mga eksperimento, si Secretary Ona wa g’yud niya ang-anga ang mga bata g’yud?

Porbida. Siya ang nag-una nga nagpasiugda niini dinhi sa nasud maong siya pud ang una’ng sakop sa gabinite ni Pangulong Aquino nga miluwat sa katungdanan.