Tugas ug gabon

Ang 'tugas' mao kana ang 'lagundi' sa tagalog. Ug ang 'gabon' mao kana ang 'sambong' usab sa tagalog. Karaang tambal kini sa atong katigulangan kaniadto pa. Karon gihimo nang tabletas o medisina, nga mapalit na sa atong mga botika. Ang nakanindot niini kay mahimo ning mapalit nga wala nay reseta.

Sa tugas o lagundi, ang dahon maoy gigamit nga tambal. Apan kadtong klase nga ang dahon murag palad nga may lima (5) ka dahunan. Dili kadtong tulo (3) ray dahon ang porma, kay para to pamatay sa mga insekto. Makaayo kini sa adunay gipamati nga ubo, hubak, sip-on ug hilanat.

Magpabukal ka lang og 6 ka kutsarang tinadtad sa preskong dahon niini o 4 ka kutsarang tinadtad sa pinauga sa landong o hangin, dili ibulad sa adlaw. Ilunod sa nagbukal nga 2 ka basong tubig, sulod sa 15 minutos nga dili takuban. Pabugnawa ug salaa. Bahina sa katulo nga imnon sa buntag, udto ug gabii kada human sa kaon. Mahimo moinom ka usa kada adlaw para mintinans.

Sa gabon o sambong, dahon gihapon ang gigamit nga tambal. Balhiboon kini og dahon nga bahoan kaayo kun kurison ang dahon.

Makaayo ni alang sa naglisud sa pangihi. Makapahilis sad ni sa mga bato sa kidney apan dili kun kini naimpeksyon na. Ang pagpreparar niini pareho ra sa tugas o lagundi.

Ang atong Departamento sa Agrikultura o sa Bureau of Plants, sa tanang rehiyon sa nasud, aduna sila’y abunda nga semilya aning mga tanoma. Ang DOST usab (Dept. of Science and Technology) motabang sila sa mga gusto magnegosyo niini, kun unsaon paghimo'g tabletas. Ang uban gani niini ipang-export na kay daghan nang nakasulay nga epektibo ug wala kini sayd-epek.