Kompiyansa sa kaugalingon

Bisan unsa nato ka andam o kasuheto unsay mahimo sa kaugalingon, dili gyud malikayan, maburong o mawala kita sa paminsar. Mahatiurok kita kun aduna nay uban nga maminaw nato sa palibot o atubangan. Mura ta’g bation og pangurog o kulbaan, kay maoy anaa sa atong hunahuna nga basin may ikasaway o adunay dili maayong komentaryo sa atong pakighinabi nila.

Ang kauwaw o kataha, natural kining bation nato ilabi na nga wala pa kita maanad o makasinati sa kadaghanan. Sa pakig-atubang nato nila, nga sa ilang dagway nga mapahiyumon, anaa sa isip mo ang mga negatibong reaksyons. Nga maoy nakalarag nga namikog o na inutil ang panumdoman mo. Ingon sa di ka kasabot sa gibati mo, kini kay wala kay kompiyansa sa kaugalingon.

Isipa sa imong pakig-atubang nila, ikaw ang mas nakalabaw nilang tanan. Nga ikaw lay labing nasayud sa buot mong buhaton. Dili kini problema kun ediskubre ang kaugalingon mo sa paghingilin sa mga hinungdan nga maoy mopugong pagpakalma, nga dili kita maratol nga mawala sa kaugalingon.

Di ka maghuwat unhan sa kahingangha, kinahanglan maantigo kita makibagay sa ilang mga lihok. Hingusgi nga ikaw gyud ang modominar sa pundok kun unsay mga hilisgutan o diskusyon, hangtud mabatyagan mo nga inanay nga makabaton ka nag hingpit nga kompiyansa sa kaugalingon mo.

Pait ning kulang ta sa kompiyansa, kay daghang oportunidad ang mawala.  Busa angay tang mahiligon sa pakigsandurot, aron maanad kita nga mabatyagan ang hiyas sa mga tawo nga ato sab kakuhaan nga mabalanse ang pagkuha sa ilang mga ikasulti bahin kanimo.

Isipa nga ang mga opinion nila maoy agianan o hagit nga mopalig-on sa imong kompiyansa sa kaugalingon.