Pangandaman ang kalamidad

Ang milabay nga tuig nagbilin kanato og daghang timailhan ug basehanan nga dili gayud angay ibaliwala ang kalamidad ug ang gobiyerno ug katawhan kinahanglan nga mangandam sa mga katalagman ug kalamidad nga mobisita ug moabot sa nasud.

Ang bagyo’ng Ruby ug Seniang nagpamata ug nagpukaw sa gobiyerno ug katawhan nga mas maayo’ng palig-onon ang pagpangandam sa kalamidad ug katalagman, mahinay man kini o makusog kay sa pagtubag o pagresponde niini.

Ang gihulagway nga super bagyo nga si Ruby tungod sa kakusog sa hangin nga dala niini wala makabilin og dako’ng kadaot sa kinabuhi ug kabtangan tungod sa grabe’ng pagpangandam sa tanan apil na niini ang pag-ampo nga akong gituohan nga nakapahinay sa hangin sa bagyo sa diha’ng miabot kini sa Pilipinas.

Ang bagyo’ng Seniang nga gihulagway sa PAGASA nga hinay mibilin og dako’ng kadaot sa kabtangan, inprastraktura ug daghang kinabuhi nga nakalas kini tungod sa kakuwang sa pagpangandam sa mga tawo ug mga lokal nga kagamhanan gumikan ba kaha sa kahinay sa hangin nga dala sa bagyo’ng Seniang sigun sa bana-bana sa PAGASA.

Ang katawhan kinahanglan usab nga security conscious ilabi na sa mga katalagman ug kalamidad ug dili kay magsalig lang sa mga pahimangno sa gobiyerno ug ubang nagpakabana.

Labaw sa tanan, ang katawhan kinahanglang disiplinado ug dili magmagahi sa ulo kun kini pahimangnoan.