Mga gahi’g ulo
May mga lugar nga naigo sa bagyo’ng Seniang kansang mga molupyo nagmahay sa gobiyerno kay wala kuno sila pugsa sa pagpabakwit aron mahilayo sa disgrasya. Kini tungod kay nadisgrasya man sila, pero kun wala pa sila masugamak sa baha ug landslide, aw wala sila’y pagmahay sa gobiyerno.
Mao man g’yud ni’ng tawo, sama bitaw sa panahon ni Noah nga gumikan sa kagahi sa ulo sa mga tawo niadto’ng higayona, gilumsan sila sa Dios sa baha. Ang nalibre mao ra ang pamilya ni Noah (Noe) nga mao ang iyang asawa, tulo ka anak ug tulo ka umagad. Karon ginagmay ra man kini’ng hitaboa, pero ambot may ngilngig ba kaha nga panghitabo sa kalibotan nga mao unta ang labing angay bantayan sa katawhan.
Sa milabay’ng pasko ug pagsugat sa bag-ong tuig, giisip sa mga tinugyanan sa gobiyerno nga mingaw, kay d’yutay ra man ang nabuthan sa mga pabuto.
Bisan ang taga ospital nga namaid na daan sa ilang mga gabas, gunting, ug dagom alang sa putlonon nga mga kuyamoy, nagmika lang kuno ang ubang mga doctor tungod kay wala’y biktima sa pabuto nga nadala sa tambalanan .
Ang uban mipasangil nga naggumikan kuno kay wala’y kuwarta ang kadaghanan, kay kun kuwartahan pa ang mga tawo, aw daghan kaayo’ng kuyamoy ang mapul-ong.
Sa Davao City bitaw kuno, 15 anyos na nga mingaw kaayo sa panahon sa pasko ug sa pagsugat sa bag-ong tuig didto tungod kay isug kaayo si Mayor Duterte pagpatuman sa balaod pagdili sa pabuto. Aw hinuon napasunod g’yud ni Duterte ang taga Davao, apan dinhi sa Cebu, maarang-arang karon kay kuwang sa kuwarta.
Maoy hinungdan nga gipasagdan lang ni Mayor Mike Rama, total kun mapungkol mo sa pabuto, aw maayo nuon, may pakapin na nga "pungkol" ang inyong ngalan.
* * *
- Latest
