Semana humang Seniang
Sa imong pagbasa niini, mahimong nahuman ug maagian na ang puthaw ug mas lig-on nga footbridge nga gitukod sa Department of Public Works and Highways (DPWH) puli sa Dumlog Bridge sa Simala, Sibonga kansang approaches gibanlas sa bagyong Seniang. Nga maayong balita alang sa mga pasahero gikan ug paingon sa Sibonga ug ubang bahin sa habagatang Sugbo:
Mas luwas nang temporaryong taytayan ug hinaot nga mas daghan nang magkadungan og agi ug maibanan ang gidaghanon sa matanggong nga mga tinun-an ug trabahante nga mamalik gikan sa taas nga bakasyon; ug
Wa nay mangolekta og bayad gikan sa nahasol nang daan nga mga pasahero, pangilkil man o pamarayeg nga donasyon.
* * *
Matud ni Mayor Lionel Bacaltos sa Sibonga nga giguba nang kontrobersiyal nga taytayan nga hinimo sa nipis nga kahoy ug gagmay’ng kawayan. Nga nahimong tinubdan sa panagsungi tungod sa pasangil nga inay mutabang sa mga natanggong sa trapiko ang pipila ka molupyo nagpahimus na hinuon sa sitwasyon. Nipasabot si Bacaltos sa DYAB Radyo Patrol nga wa mangilkil ang mga mangingisda nga naghimo sa unang temporaryong taytayan. Kay mga biktima man sila ni Seniang, nangayo og donasyon isip bayad sa ilang kahago ug materyales. Apan ang nangreklamo nga mga pasahero niingon nga way nagpahibawo nga di sila obligadong mobayad sa gikolekta nga singko pesos.
* * *
Wa hinuon makapasabot si Bacaltos nganong way bisan usa ka opisyal sa barangay Simala, sa munisipyo sa Sibonga, sa Kapitolyo sa Sugbo ug sa DPWH, nga pulos sinuholan sa mga magbubuhis pagpanalipod sa ilang interes, nga nakahunahuna sa gihimo sa mga mangingisda, kinsa di hingpit nga matulisok nga nipalabi sa ilang personal nga mga panginahanglan.
Nagkinahanglan sila og dul-an sa semana nga sibaw nga reklamo sa mga pasahero una nakamatngon nga, human sa pangangkon nga nisimpatiya sa kapait sa kahimtang sa mga biktima sa bagyo ug nipasalig paghimo sa tanan pagtabang nila, napakyas pagtubag sa batakang panginahanglan paghapsay sa ilang biyahe.
* * *
Niinsistir si Bacaltos nga wa sila mohunong sa pagpangita og alternatibong mga agianan sa buses ug dagkong trucks bisan wa pa kasugod ang DPWH pagtukod og steel bridge. Apan nabawo ang tanan nilang paningkamot tungod sa sigeng uwan nga nakapalapok sa ilang gikubkob ug gipalapad unta nga mga dan.
Napamatud-an na nga, bisan sa pait nga leksiyon sa bagyong Yolanda niadtong Nobiyembre 2013, ug tingali tungod sa pagkabawo sa mas lapad nga pangandam alang sa nihungaw nga bagyong Ruby sa niaging buwan, di igo ang pangandam sa gobiyerno alang sa bagyong Seniang. Hinaut nga inay mopaundayon makabawi ang lokal ug nasudnong gobiyerno ug di mangambisyon pag-ambas o paglabaw pa sa kalangay sa paghatod sa tukmang tabang sa mga biktima sa nangaging mga katalagman.
* * *
- Latest
