Magbag-o na ta uy!

Ikaduha’ng adlaw karon sa tuig 2015, ang tuig nga giingong sa matag 10 ka tawo, siyam niini ang milaum nga moumento ang ilang pagpuyo.

Umento sa panginabuhi, panglawas, ug sa laktod milaum sila nga maayo ang kondisyon sa ilang panarbaho ug negosyo.

Maayo unta kun matinuod kini, aron nga wala na kaayo’y kawatan ug tulisan ingon man mokunhod usab ang krimen, ilabi na ang pinatyanay.

Hinuon usa sa mga sukdanan nga moumento ang panginabuhi sa tawo mao ang iyang kakugihan sa pagpanginabuhi nga legal.

Sa ilegal nga panginabuhi, sama sa kugihan sa pagpamaligya og gidili nga drugas, ang nagbuhat niini, moumento man tinuod ang pagpuyo, apan maot kaayo og dungog, ug duha ray padulngan niya. Kini mao ang prisohan o kaha menteryo.

Sama ra gihapon sa mga kawatan ug tulisan kinsa gusto nga moharuhay ang pagpuyo pinaagi sa bahandi nga kinawat.

Kun hipatyan o kaha mapriso sa tibuok kinabuhi, sama ra nga gitagan-an niya og bahandi ang kabit  o laing bana sa iyang asawa.

Ning tuiga, kun tinuod man nga mosaka pag-ayo ang ekonomiya sa nasud uban usab sa pagsaka sa panginabuhi sa katawhan, moduyog usab pagsaka ang krimen.

Kini gumikan  kay dili na makontrolar ang pagdagsang sa ilegal nga drugas.

Sa ilegal nga drugas moisog ang tawo sa pagpatay, pagpangawat ug pagpanulis, pagpanglugos, ug tanang matang sa krimen nga gusto niya nga buhaton. ([email protected])