Maayo’ng Bag-ong Tuig

Maayo’ng Bag-ong Tuig kaninyo’ng tanan akong mga suki nga magbabasa. Ako manghinaot nga uban sa panalangin ug giya sa kahitas-an, mahimo’ng mabungahon ang atong kinabuhi ning Bag-ong Tuig sa pagpakabuhi.

Ang Bag-ong Tuig nagkahulogan kini ug bag-ong hagit sa tanang aspeto sa atong kinabuhi ug ako nanghinaot nga aduna gayu’y kabag-ohan sa atong kinabuhi.

Ako manghinaot nga aduna na usab unta’y kabag-ohan sa dagan sa politika. Nga ang maayo unta nga politika ang ipatigbabaw sa mga politiko ug dili ang dautang politika nga nagnudnod sa katawhan ngadto sa kaalautan.

Nga ni’ng Bag-ong Tuig mao na untay ipatigbabaw sa mga namunoan sa nasud ug sa dakbayan sa Sugbo ang kalamboan sa katawhan ug dili ang kaugalingon niini’ng kaayohan.

Unta ning Bag-ong Tuig mawagtang na usab ang suliran sa kakabus ug kawad-on, kakuwang sa trabaho ug dili na unta magsige og saka ang presyo sa mga palaliton.

Makaangkon na unta og balay ang mga walay mga balay, anaa na unta’y yuta ang mga walay yuta, maabunda unta ang pagkaon sa mga walay pagkaon.

Mawagtang na unta ang bangi sa mga muslim extremist ug katoliko, mawagtang na unta ang suliran sa krimen ug drugas. Wala na unta’y laing matang sa sakit nga walay kaayohan nga motumaw, wala na unta’y bagyo nga maghasol ug bulkan nga mobuto, wala na unta’y mga pagdahili sa yuta ug mga pagbaha aron dili na kita mabalaka sa atong kinabuhi ug mga panginabuhi.

Hinaut pa unta nga kining tanan matinuod. Maayo’ng Bag-ong Tuig Kaninyo’ng Tanan!!!