EDITORYAL – Malipayong Bag-ong Tuig

Bag-ong Tuig, bag-ong hagit sa kinabuhi sa mga Filipino. Nag-una sa mga lanog kaayong kasikas nga mapaabot karong tuiga ang politika.

Ang tuig 2014 usa sa mga puno sa paghagit nga tuig malampuson kining gilabyan sa mga Filipino sama sa nangaging mga katuigan.

Dunay mga kalamidad ug kawad-on nga nagsukod sa kalig-on sa mga Filipino, apan dunay mga kasikas sa politika nga nagpakita sa tinud-anay nga dagway sa mga tawong nagpaluyo niini ug uban pa. Karong tuig 2015, laing hagit ang atubangon sa tagsatagsa ka mga Filipino, maayo man o dili apan kinahanglang atubangon. Sa tuig 2014 misugod na og bukal ang politika, nanggimok na ang mga piyesa sa mga makinarya sa matag politikanhong partido.

Hinayhinay nang gipamutang ang mga tawong sa tan-aw sa grupo dunay mahimo pabor sa ilang interes. Sa naghinapos nga bahin niining tuiga, makapaabot ang mga Filipino nga daghang manggawas nga mga desisyon ug rekomendasyon gikan sa nagkadaiyang quasi judicial bodies batok niadtong mga local ug national political figures nga gipangkiha sa nakalabay’ng duha ka tuig, sagad administratiba ug duna say kriminal, tumong niini nga sila masuspenso sa ilang mga posisyon o ba kaha mapriso.

Maniobra kini sa ilang mga kaparehas nilang gamhanan ug impluwensiyadong kaaway sa politika aron dili nila magamit ang resources sa tagsatagsa nila ka mga buhatan sa ilang pangampanya sa umaabot nga 2016 elections.

Dili na kini bag-o, sama sa mga katalagmang nanglabay gipaabot nga makamao gihapong mosakay sa dagan sa hangin ang mga Filipino aron makaabot gihapon sa ilang destinasyon.

Maayo ug malambuong Bag-ong Tuig kanatong tanan.