Sayop g’yud si Bobby

Ang huna-huna ni Mr. Bobby Nalzaro dili gayud magkatukma.

Sa iyang lindog sa mantalaan (Disyembre 29) gusto niya nga ipasabot nga ang kaso nga Libel nga akong gipasaka batok kaniya walay basehanan ug angay’ng ilabay lang sa basurahan.

Apan samtang kini ang iyang baruganan, si Nalzaro miingon nga duna siya’y 50 ka abogado nga nag-andam sa iyang depensa. Uy, 50 ka abogado alang sa garbage case?

Isip pagpahinumdom sa publiko, mipasaka ko og 38 ka kaso nga administratiba batok ni City Treasurer Diwa Cuevas. Matud ni Nalzaro nga pipila sa mao nga mga kaso buhat-buhat lang, mao nga mipasaka ko og kaso nga Libel.

Sa laktud, gipasanginlan ko ni Nalzaro nga bakakon. Ako nga katungod ang pagdepensa sa kaugalingon aron imatuod nga si Nalzaro maoy bakakon.

Unya, si Mr. Valeriano Avila midepensa usab ni Nalzaro pinaagi sa iyang lindog nga giulohan og “Libel is a threat to press freedom.” Tan-awa? Buot ipatuo ni Mr. Avila nga ang Press Freedom maglakip sa freedom alang kang Nalzaro sa pagpamakak.

Ang gusto lang g’yud nako nga iprobar sa katawhan nga wala ko maghimo-himo og mga kaso batok ni Treasurer Cuevas. Si Mr. Nalzaro dunay 50 ka abogado nga nagtuon sa giingon niya nga naghimo-himo ra ko og kaso batok sa city treasurer.

Ang pagkuha niya og daghan pa nga abogado nga modepensa kaniya, mas magpadayag kini nga naglisud si Nalzaro pagpangita kun hain sa mga kaso ang hinimo-himo.

Hangtud karon, si Nalzaro wala pa gayud makatudlo kun hain sa mga kaso nga akong gipasaka ni Treasurer Cuevas nga giingon niya’ng “fabricated.” Walay kahumanan nga pagpangapkap.