Salamat 2014

Manamilit ang tuig 2014 nga adunay katalagman nga gipabawon nato’ng tanan. Kapin sa 150 ka pasahero ang padayong gipangita dihang nawagtang sa kawanangan ang abyon sa AirAsia gikan sa Indonesia paingon sa Singapore.

Nakugang ang kalibutan sa ikatulo nga dako’ng aksidente sa aviation industry su’d ning tuiga. Ang tulo ka abyon pulos nagbase sa Malaysia.  Daghan ang nakapangutana ngano’ng nahitabo kini nga katalagman.

Manamilit ‘sab ning tuiga nga adunay bagyo nga nakasu’d sa Pilipinas. Si Seniang ang giisip nga labing katapusang bagyo nga nisu’d sa nasud ning tuiga. Apan likod sa mga pagsuway daghang grasya nga angay pasalamatan.

Napamatud-an nato’ng mga Filipino nga wa’y imposible’ng pagsuway alang sa nagkahiusa nga mga tawo. Likud sa mga katalagman sa tuig 2013, kansang epekto mas nabati pa ning tuiga, daghan sa mga Filipino ang nibati sa gugma ug pagpangga sa mga isig ka Filipino ug bisan sa ubang tawo sa kalibutan.

Ang mga pangutana ngano’ng nahitabo ang bagyo’ng Yolanda, nahatagan og tubag ning tuiga pinaagi sa mas luwas ug mas epektibo’ng paagi sa pagpangandam sa katalagman.

Nahatagan og mas tataw nga tubag ang daghan nga mga kabalaka ngano’ng kinahanglan ang mas taas-taas nga preparasyon ang bisan unsa man nga katalagman.

Salamat sa 2014 nga nahatagan og katumanan ang atong dugay na’ng gipangandoy nga isog ug hait nga ngipon batok sa kurapsiyon.  Atong nakit-an ning tuiga ang pagkabilanggo nila’ng senador Revilla, Enrile ug Estrada tungod sa pasangil sa pangurakot.

Sa maong higayon nabuhi ang atong pagsalig sa hustisya sa nasud dihang dagko’ng mga personalidad na ang nabilanggo tungod sa mga pasangil sa kahiwian.

Nagbukas ang maong senaryo sa mas seryoso’ng kampanya batok sa kurapsyon sa tanang ahensiya sa gobiyerno. Ug tungod sa malampuson nga lakang, dako’ng buhi ang atong paglaum ubos niini’ng gobiyernoha.

Wa’y bisan usa ka isyu sa pagpangawat ang direkta’ng gipahid ngadto ni Presidente Noynoy Aquino hinungdan nga nagpabilin ang pagsalig sa katawhan kaniya ug labaw sa tanan ang mga negosyante ug mga mamumuhonan.

Kini ang hinungdan ngano’ng mas lig-ong ekonomiya ang atong natagamtaman karon. Sa labing unang higayon su’d sa dugay na’ng katuigan, nakaangkon ang nasud og respeto sa international community.

Karon, mas kampante ang mga negosyante nga mosu’d sa nasud.  Apan labaw natong gipasalamatan sa kahitas-an mao ang mga grasya nga personal nato’ng naangkon gikan sa maayong panglawas hangtud na sa pag-ambit nato sa mga grasya sa kahigayonan, malinawon nga pagpuyo ug labaw sa tanan malinawon nga konsensiya.

(Email: [email protected] or [email protected])