Ang natibong bayabas (2)

Atong nahisgutan sa miaging isyu mao ang atong Pinoy o natibong bayabas. Gawas nga kining tanoma daghang benepisyo nga mahatag sa panglawas, ang tanang parte niini sama sa bunga, dahon, panit ug gamut –– epektibo usab nga tambal sa mga sakit. Ang katapusang gihisgutan nato ang paggamit sa dahon nga napabukalan nang giandam para itambal sa may sakit.

Sa nagkalibang, nagsuka, ug sakit sa tiyan, para sa hamtong o edaran––moinom og 8 ka kutsara  para sa batang 7-12 anyos, moinom og 4 ka kutsara

Para sa nag-edad og 2-6 anyos, moinom og 2 ka kutsara. Mahimo sad ni nga ilimugmog para sa piyoriya o sakit sa lagos. Ang lab-as nga udlot niini mahimo nga usapon lang kun magsakit ang ngipon.

Ang panit sa punoan sa bayabas, mao gihapon ang buhaton. Kuhaa ang panit pinoha o tadtara. Pabukali ang 1 ka hakop niini sama sa gibuhat sa dahon, mao usab ang gidaghanon. Ang humokong bahin sa salingsing, kuhaan sa mga udlot, limpyohan ug hugasan. Ang tukog, dukdokon nga himoon kining sepilyo o toothbrush nga panglimpyo sa lagos. Wala na kinahanglana ang toothpaste kay ang duga niini duna nay natural nga kemikals nga makatambal sa lagos.

Mga pahinumdom sa paggamit sa tanom nga tambal; *Kun magpabukal, mas maayo nga kolon ang gamiton, ug dili takoban samtang magbukal na. Aron mangalisngaw ang mga toksin nga naa sa tanom. *Angay man gud nga paalisngawon ang mga element nga wa na kinahanglana sa pagtambal.

Busa pangita’g paagi sa tugkaran ninyo makatanom mo niini, kay kun modako ug mamunga na, daku ni’g mahimo alang sa kahimsog sa panglawas.