EDITORYAL – Mga tanod way gamit vs pabuto

Pipila ka mga tuig na ang nanglabay sukad nga gilusad sa Department of Health ang Oplan Iwas Paputok niini aron kamenusan ang gidaghanon sa mabiktima sa mga pabuto.

Sugod niadtong Disyembre 21, ang DOH nakatala na og 73 ka mga kaso sa nabuthan og pabuto, ang 43 niini nahitabo atol sa pagsugat sa miaging Pasko, ang 19 niini  dinhi sa Central Visayas.

Wa matagam o mahadlok ang mga ginikanan niining makaguba og kaugmaon nga matang sa pabuto, ang Piccolo.  Matud pa sa DOH, sa 73 nga nabuthan, 50 niini tungod sa Piccolo. Ingon niini kini ka peligro alang sa mga bata.

Kanus-a pa kaha mahitabo nga magsaulog ang Pilipinas og Pasko o mosugat sa Bag-ong Tuig nga way madisgrasya sa pabuto?

Ang hinungdan niini mao ang katapolan g’yud mismo sa mga lokal nga awtoridad pag-implimentar sa mga ordinansa sa tagsa-tagsa nila ka mga dapit.

Nag-unang tapolan ug wala magpakabana niini ang mga barangay officials kay mahadlok ba kaha sila nga dili na botaran sa mga naninda og pabuto sa ilang dapit. Ang mga barangay tanod nagbarog-barog lang sa kilid sa mga naninda og pabuto nga gibutang sa nigo ug palanggana kilid sa mga dalan, apan wala g’yud sila makabadlong.

Way mga barangay officials nga nilibot sa mga tindahan aron did-an sila nga makabaligya og pabuto. Mao nga duna g’yuy mga batang makapalit niini.

Tingali , wala usab silay kalibotan kun unsay ilang trabaho ug kun duna bay ordinansa batok niini. Apan bukhad kaayo sila sa ilang mga kamot ini og dawat og honorarium.

Ang ilaha, maghuwat sila og dunay pormal nga moreklamo, inay nga sila maoy mopatuman sa balaod bisan naa na sa ilang mga simod ang kalapasan.