Pasko na pud!

Ning atong pagsaulog sa lain na usab nga Pasko sa atong kinabuhi, maoy atong panghinaut nga ato kini’ng kahatagan og tukma’ng kahulogan.

Usahay gud, manubra ang atong celebration, ang tanan alang sa mga butang ning kalibutan, alang sa katagbawan sa atong mga kahinam sa lawas.

Kaon ug inom dinhi, kaon ug inom didto ... mao ra ba kini ang atong Pasko? Unya, ang hinungdan ug ang gipahinungdan sa Pasko, way labut sa kasaulogan? Maoy gidangat!

Anyway, let’s give true meaning to Christmas.

* * *

Ambot naunsa na ang atong kalibutan karon. Bisag unsa na lang nga matang sa krimen ang manghitabo. Mga krimen nga dili kita maka-imagine nga mahitabo.

Sa America, pananglitan, usa ka 12-year old girl, gidunggab 19 ka higayon. Kinsay nagdunggab? Ang duha ra ‘sab niya ka amiga nga kaedad niya. Giingon nga ang suspects, were “inspired by Internet horror stories.”

Tinuod, unsa man karon ang sugilanon sa Internet, sa television ug sa ubang media outlets ... di ba kasagaran mga horror stories man, mga patay nga maglakaw-lakaw, mga bitin nga mas dako pa kay sa kinadak-ang building sa New York, mga creatures gikan sa ubang planeta nga mas powerful pa kay nila ni Superman ug Batman, ug uban pang mga violent kaayo nga mga sugilanon.

Ug alang sa atong mga batan-on nga nagyampungad sa computer ug sa television, ma-influence usahay sa ilang makita. Ang duha ka suspects gipasakaan og sumbong as adults, bisag mga minor pa. Attempted first degree intentional homicide ang kaso. Piyansa,$500,00 matag usa kanila. Dinhi sa ato, di ta kapasaka’g kaso sa mga minor.

Nasayran nga dugay na’ng nagplano ang duha pagpatay sa ilang classmate. Una, maoy ilang plano nga taptapan ang baba niini samtang matulog, ug dunggabon dayon ang liog. Unya nagplano usab sila nga ilang lumsan sulod sa bathroom, diin dili sila maproblema pagpanglimpiyo.

Finally, nakahukom sila nga adto nila patya sa park nga daghang kakahoyan, samtang nagduwa sila’g hide and seek, tagu-tago. Apan, wala nila mapatay ang ilang classmate. Ang nagkadugo niyang lawas nakit-an sa usa ka nagbisikleta sulod sa parke.

Pastilan, naunsa na ang atong kalibutan karon?

* * *

Excellent LTO offices. Sa gihimo sa Civil Service Commission (CSC) nga nationwide survey labut sa RA 9485, kon Anti-Red Tape Act (ARTA), 28 ka buhatan sa LTO sa tibuok nasud ang nakadawat og rating nga “excellent.”

Niining 28 ka “excellent” LTO offices, duha ra ang sa Central Visayas: Siquijor ug Medellin extension office. Unsa man diay ang Cebu City, ug ubang mga district ug extension offices sa LTO sa Sugbo ug sa Central Visayas?