Mar-Grace mag-tandem

Milutaw karon ang kombinasyon nga Mar Roxas-Grace Poe alang sa 2016 nga presidential elections.

Sa mga survey nga gihimo sa Pulse Asia ug SWS, kanunay nga nag-una si Senador Grace Poe sa mahimo’ng presidente ug bise presidente sa nasud.

Ang nakaapan kay padayong nagmagahi ang senador sa iyang baruganan sa dili pagpapili pagka presidente o bise presidente sa nasud. Sa akong tan-aw lig-on ang gipalutaw nga Roxas-Poe nga kombinasyon.

Si Poe sikat tungod ni Fernando Poe Jr. ug sa maayo niya nga performance isip senador. Samtang maoy dakong puhonan ni DILG Secretary Roxas ang iyang kasinatian sa ehekutibo isip kalihim sa DTI ug DILG sulod sa dugay’ng higayon.

Sa laktod, hinog na si Roxas aron mahimo’ng presidente sa nasud.

Ang angay lang niya nga himuon mao ang pagpasabot sa katawhan nga dili dautan ang pagka adunahan ug ang pagkaanak sa adunahan nga mga ginikanan tungod kay usa kini sa gihimo’ng isyu batok kaniya.

Kinahanglan nga itataw ni Roxas nga wala magpasabot nga kay siya dato dili siya mobati sa kahimtang sa mga kabus. Nga dili isyu ang pagka dato tungod kay sa Pilipinas wala pay pobre nga na presidente.

Ang importante nga ang mahimo’ng presidente bisan dato adunay pagbati sa mga pobre ug nagtinguha nga maalibyohan o mapataas ang ilang kahimtang.

Ang Roxas- Poe nga kombinasyon dako’ng suliran ni Bise Presidente Jejomar Binay kay ang gihuna-hunaan niya nga ika-tandem nga si kanhi presidente ug karon Manila Mayor Erap Estrada hayan dili na mokuyog kaniya kay adto kini mosuporta sa kandidatora ni Grace Poe.

Usa ka maayo’ng taktika sa Liberal Party ang gipalutaw nga kombinasyon tungod kay ang dako’ng pangalan nga gisaligan ni Binay mawagtang kaniya ug mapunta kini kang Mar Roxas.