Anomaliya sa prisohan

Lisod gayud nga tuohan nga walay kalibotan ang kadagkoan sa bilanggoan sa mga nanghitabo sulod sa mga prisohan sa nasud. Imposible nga malutsan sila sa ilegal nga mga binuhatan sa mga piniriso.

Sa dakong kontrobersiya nga mihapak karon didto sa National Bilibid Prison (NBP) didto sa kaulohan, tataw nga adunay kasayuran ang management sa maong prisohan sa haruhay nga kahimtang sa pipila ka piniriso didto.

Sa gihimong pagronda sa mga sakop sa National Bureau of Investigation ug kapulisan sa NBP, nadiskitahan ang grabe ka bongga sa kinabuhi sa mga high-profile nga binilanggo, ilabi na niadtong mga adunahan.

Tiaw mo nang adunay mga piniriso didto ang nagpuyo sa selda nga adunay aircon. Ang uban nakahimo pa kuno pagpatukod og swimming pool. Gani adunay dato ug impluwensiyado nga mga piniriso ang makagawas pa sa NBP aron pagpa-admit sa mga pribadong hospital.

Ang grabe nga kataw-anan mao ang pagtukod og usa ka recording studio sa usa ka konbiktadong bank robber sulod sa maong bilanggoan. Libre kuno nga nakarekord og kanta ang maong binilanggo. Ug gani nahimo kunong platinum ang iyang album tungod sa kakusog sa halin niini.

Karon imposible nga walay kalibotan ang kadagkoan sa NBP niining mga espesyal nga pribiliheyo sa mga adunahan ug impluwensiyado nga mga binilanggo. Klarong adunay dakong kuwarta nga nalambigit niini.

Kun nahitabo man kini didto sa NBP, walay rason nganong dili kini mahitabo sa ubang prisohan sa nasud. Ug dinhi lamang sa Cebu Provincial Detention and Rehabilitation Center ug sa Cebu City Jail, daghan ang nagduda nga adunay mga binilanggo nga nakabaton usab og mga special privileges.

Gani, sa gipahigayon nga pagronda sa mga piniriso diha sa CPDRC dili pa lamang dugay, daghang cell phones ug uban pa ang nasakmit sa otoridad. Dakong gidili ang paggamit og cell phone sa mga piniriso. Apan nganong nakasulod man kining maong klase sa butang diha sa maong jail facility?

Imposible nga walay kalibotan ang kadagkoan sa maong prisohan niini. Kay nahitabo man kini, dili nato malikayan ang magduda nga adunay kwarta nga gitingal ngadto sa pipila ka opisyal sa maong bilanggoan. Ambot kun masulbad pa ba kaning maong dakong problema. Kini tungod lagi kay grabe na ang paggamot sa corruption diha sa mga jail facility sa nasud.