Pasko sa pagkatawo

Ato lang unang ihiklin ang  Mahitungod sa Damgo kay atong Patidluman ang mga Punto sa Pamalandong Alang sa Pasko sa Pagkatawo sa atong Ginoo pinaagi ning mga Tinagsip nga mga Pamalandong

Ning nagsingabot nga Pasko sa Pagkatawo sa atong Ginoo kita gidapit nga:

1. Magmapasalamaton bisan pa man sa mga trahedya (natural o hinimo sa tawo) sama sa kinaiya ug taras nga gipakita ni Job sa Daang Tugon.

2. Pagsaulog sa Kinabuhi bisan taliwala sa iyang mga kakulangan.

3. Paghatag og kalipay ngadto sa uban bisan pa man kun kita mismo ang nakasinati og kaguol. Hinumdomi, mahinungdanon kaayo ang emotion contagion diha sa pakigrelasyon. Kay kun atong sugnoran ang kagul-anan mamahimong magmagul-anon ang mga tawong nagpalibot kanato. Apan kun atong halingon ang kalipay nan, makahatag kita og pahiyom nga moresulta tingali sa katawa ug kasadya kanila nga nagkinahanglan niini.

4. Kahilom diha sa pag-ampo. Taliwala sa kagahob sa kalibutan sa negosyo, ang Pasko sa Pagkatawo panahon sa paghilom aron mohimo kita og balik-lantaw sa nangagi ug aron maandam kita sa ugma.

5. Ug ang haom nga panahon sa pagsaulog sa kinabuhi mao ang KARON.