Ipadaplin usa ang politika

Dili kaayo dako ang gibilin nga kadaot sa bagyo’ng Ruby kun hisgotan ang gidaghanon sa mga kinabuhi’ng nakalas, pananom ug inprastraktura. Kini kun atong ibase sa mga kusog nga bagyo nga mibisita sa nasud sama sa Yolanda.

Ang kamenos ra sa kinabuhi’ng nakalas sa mga dapit nga naagian sa bagyo’ng Ruby atong ma-credit ngadto sa mga opisyal sa lokal nga kagamhanan nga naghimo sa subsob nga pagpangandam ug pagpahimangno sa katawhan aron malikay sa peligro.

Dinhi nakatampo g’yud si DILG Secretary Mar Roxas, DSWD Secretary Dinky Soliman ug ubang sakop sa gabinite ni Presidente Aquino kay ni’ng uwahi’ng bagyo nga mibisita wala na sila magpauwahi paghimo sa ilang katungdanan.

Tugotan nato nga tinuod ang pagtuo sa uban nga gusto lang mamawi si Roxas ug Dinky Soliman sa ilang palpak atol sa bagyo’ng Yolanda, pero dili pud nato ikalimod nga nagbunga ang ilang mga kahago nga gihimo aron mapahimangnoan ang katawhan sa kapeligro sa ilang kinabuhi kun dili mangandam.

Sigun sa akong nakita, nakatutok na ang mga mata nila ni Roxas ug Soliman sa ilang trabaho nga walay pagpamolitika hinungdan nga maayo ang bunga sa ilang pagpaningkamot. Daghan pa og mahimo’ng kaayohan si Roxas kun mao la’y tutokan ang iyang trabaho ug dili magpatugaw sa pamolitika kay mao lang kini ang makaguba sa iyang focus.

Sa akong tan-aw, aduna pay daghang maprobar si Roxas sa katakus niya pagdumala sa DILG kun dili lang usa siya magpabalda sa politika. Sa pagkakaron mao nay akong nakita kang Roxas ang iyang pagka Mr. Palengke kaniadto ug lauman nato nga daghan pa siya og maayo’ng performance.

Kun nagtuo kamo nga namolitika si Roxas pagtuman sa iyang trabaho dili ko kamo pugngan apan hatagan pud nato siya og credit sa iyang gihimo ug ang uban nga naningkamot aron malikay ug maluwas ta sa bagyo’ng Ruby.