May uyab diay’ng Insik

Mopaingon na’ng mosawop ang pagka-popular ni Bise Pres. Jejomar Binay. Dayag kini sa pagtibugsok sa iyang rating sa sagunson nga survey ug diin ang katapusang survey sa Pulse Asia niadtong Nobiyembre, singko porsiyento ang pagkatagak sa iyang rating.

Parehas sa nahitabo ni kanhi senador Manny Villar nga hilabihan kataas sa rating sa mga unang bulan paingon sa 2010, ang kasikat ni Binay nagkahilis na ug lisod makabawi sa kalayo pa sa 2016.

Samot nang daghan pang giandam ang kampo ni kanhi Makati bise mayor Ernesto Mercado batok kang Binay. Gikan sa Amerika si Mercado ug klaro nga nagdala kini’g daghang ebidensiya sa mga bahandi sa pamilyang Binay.

Samot na nga utrong asawa niini nga si Dra. Elenita Binay giunay na sa kauban sa pagpasangil ug pangawkaw ug nag-atubang na og kaso sa Sandiganbayan.

Human gipublikar sa Pulse Asia ang survey results, makapa-shock ang pagsaka sa popularidad ni Sen. Grace Poe.

Kuyaw og mao na hinuon siya’y ikonsiderar sa mga kampo nga standard bearer tungod sa makalilisang niya’ng pagsulbong sa survey.

Adunay mga estorya nga anak si Grace sa gawas ni anhi’ng diktador Ferdinand Marcos sa artistang si Rosemarie Sonora ug gi-adopt lamang siya ni Fernando Poe Jr. ug Susan Roses.

Kasaligang tinubdan sa Senado mitug-an g’yud nako nga si Sen. Bongbong Marcos maayo kaayo’g tinagdan kang Grace, timailhan nga giila niya kining igsuon sa gawas.

Kun mao, solid north ni Bongbong itagana kaha kang Grace? Apan ang problema dili mosugot si Kongresista Imelda Marcos kay gusto niini si Bongbong ang mag-presidente.

Sa ulahing survey nga mi-us-os usab og 6 porsiyento ang rating ni DILG Sec. Mar Roxas. Una, wala kini mopasikat sa iyang mga nabuhat sa DILG. Dili siya sama ni Binay nga hasta ang boodle fight ni Erap Estrada gigamit sa pasikat.

Makapaabot hinuon kita og pagtaas sa iyang rating kun motuman ang nag-package ug nag-PR kaniya sa pag-usab sa iyang image, pagpaila nga apo siya ni presidente Manuel Roxas ug anak ni senador Gerry Roxas ug mopahibalo’ng gusto siya’ng mosunod sa ilang mga lakang.

* * *

Kadto’ng babaye nga giingong wala mobayad sa gipuy-an niya’ng resort, anak og adunahang pamilya sa Southern Leyte.

Aduna diay kini uyab nga negosyante’ng insik dinhi sa Sugbo nga gikauban niya sa resort apan gibiyaan human mag-away nga wala bayri ang resort mao nga ang babaye’ng guwapa na hinuon ang nautangan sa tulo ka adlaw nga pagpuyo sa resort.

Kinsa kaha kining maong insik? Sa madugay, mailhan ra kini kun ikiha na sa pamilya sa babaye nga usa diay ka menor de-edad.