EDITORYAL – Aksidente malikayan

Give and take. Mao kini ang angay’ng hinumdoman sa mga motorista kun magmaneho sila sa ilang mga sakyanan diha sa kadalanan.

Ang tanan gusto nga mahiabot pagdali paingon sa ilang padulngan, apan usahay tungod sa ilang kadanghag ug kaagresibo pagpadagan sa sakyanan malangay na hinuon sila pag-abot.

Milugapak ang motorsiklo nga gikabangga sa usa ka kotse didto sa Gorordo Avenue eskena Cardinal Rosales Avenue alas 12:30 kagahapon sa udto. Ang hinungdan mao nga wala’y usa kanila nga mi-give way sa agianan.

Miliko sa wala ang kotse gikan sa Gorordo Avenue paingon na unta sa Cardinal Rosales ug nasugatan niya ang motorsiklo nga gikan sa Camp Sotero Cabahug subay sa Gorordo Avenue.

Resulta, milukapa sa karsada ang nagmaneho sa motor ug gamay ra ang lumping nga naangkon sa kotse. Apan imbes magdali, pareho sila nga nalangan sa ilang biyahe ug nakaangkon pa og problema.

Kun ang mga motorista magbaton lang og kahibawo sa lagda sa tukma nga pagmaneho og sakyanan, unya batonan usab niya ang kaaghop sa kasing-kasing pinaagi sa paghatag og higayon sa kaubang drayber, sigurado nga malikayan ang aksidente.