Sayang kay paborito

Bag-o na ang hepe sa Cebu City Police Office. Kini human nakugang ang tanan sa kalit nga pag-transfer ni CCPO director Noli Romana ngadto sa kaulohan ilalum kuno sa lahugay sa pipila ka opisyal sa kapulisan sa nasud.  

Apan hangtud karon, padayong nagtangag og dakong tanghaga ang iyang paghawa gikan sa dakbayan ngadto sa Camp Crame. Unsa gayud kaha ang nag-unang rason nganong apil si Romana sa maong lahugay?

Daghan ang nagtuo nga promosyon ang iyang pag-transfer ngadto sa kaulohan human sa hapit duha ka tuig niyang pagkupot sa renda sa CCPO. Kasamtangan nagkupot karon og posisyon si Romana sa Civil Security Group sa Camp Crame. 

Hinuon grasya alang sa usa ka opisyal sa kapolisan ang ma-assign ngadto sa Philippine National Police main headquarters. Ug dili ba mao kini ang damgo nga destinasyon sa tanang opisyales sa kapolisan?

Kay nagpasabot lamang kini nga duol na sila sa luwag kun atua na sila sa Camp Crame. Ug pipila ka tikang na lamang ug maangkon na nila ang renda sa pangatungdanan sa tibuok puwersa  sa kapolisan sa nasud.   Apan dako usab nga pangutana ang hilom nga pagbalhin ni Romana ngadto sa kaulohan. Bisan pa ang iyang superior, ang director sa Regional Police Office-7, wala kuno masayod sa lakang pag-transfer ni Romana.

Ug bisan ang mga opisyal sa dakbayan sa Sugbo walay ideya sa iyang kalit nga paglalin. Hangtud karon tak-om ang baba sa atong mga opisyal, ilabina si Mayor Michael Rama, sa rason pagbakwit ni Romana ngadto sa kaulohan.

Tungod niini, mitumaw na hinuon ang pangagpas nga gihulipan ni Romana gikan sa CCPO gumikan sa nagkagrabeng problema sa kahusay ug kalinaw sa dakbayan nga wala gayud masulbad sa kapolisan ilalum sa iyang pagdumala.

Makaduda tinuod ang iyang pag-transfer ngadto sa kaulohan. Tungod kay gihilom kini, mas daghan ang dili motuo nga promosyon kini apan resulta hinuon kini sa mga insidente sa pagpanulis sa mga establisimento sa siyudad.

Bisan ako adunay dakong pagtuo nga ang seryoso nga problema sa peace and order ning dakbayan maoy nakaaghat sa liderato sa PNP pagbitad ni Romana gikan sa CCPO ngadto sa Camp Crame. Sayang si Romana gumikan kay paborito pa man unta siya ni Rama.