Nakapalansang sa plitehan
Human gipatuman sa higanteng mga kompaniya sa lana ang laing dakong laslas sa presyo sa ilang mga produkto--P1.75 matag litro sa gasolina, P1.55 matag litro sa krudo ug P1.80 matag litro sa kerosene--mosamot pagsibaw ang awhag sa dinalian nga pagpaus-os sa plitehan sa mga sakyanang pamasahero.
Di lang sa Metro Manila ug kasilinganang mga lalawigan nga mao ray nakapahimus sa pasiunang P1 nga us-os sa plitehan nga gimando sa Land Transportation Franchising and Regulatory Board (LTFRB). Ug di lang sa public utility jeepneys (PUJs) kun dili apil nang uban pang mga sakyanang pamasahero, di lang sa yuta kun dili hasta sa kadagatan ug kahanginan.
* * *
Gikabalak-an nga maghuot ang nagpakabana nga mga pasahero ug mga lider sa transport groups atol sa public hearing nga gipatawag sa LTFRB sa Central Visayas karong Miyerkules, Disyembre 17, sa apiki nilang rehiyonal nga buhatan sa North Reclamation Area sa Dakbayan sa Sugbo.
Sentro sa husay ang petisyon nga gipasaka ni kanhi Cebu City Councilor Jun Pe, nga igo lang nidason sa dugay nang yangungo sa mga pasahero apan mao ray nakahunahuna sa pagpormalisar sa awhag nga laslasan ang minimum nga plitehan sa PUJs og 50 sentabos, gikan sa P7.50 ngadto na lang sa P7 sa unang lima ka kilometro.
* * *
Way makalalis sa maayong tumong sa petisyon ni Pe. Bisan ang mga nikuwestiyon sa iyang matang sa pamolitika--pagdagan pagka konsehal sa habagatang distrito sa Dakbayan sa Sugbo bisan wa pa mapupos ang iyang termino pagka konsehal sa amihanang distrito, nga posibleng usa sa mga hinungdan sa iyang pagkapilde bisan sa nagbaha og puno sa pamintaha niyang propaganda materials--napugos pag-ila nga makaayo sa mga pasahero ang iyang lakang.
Nga mao say akong hunahuna. Hangtod nga akong nahibaw-an nga ang petisyon ni Pe maoy nakapalangay sa us-os sa plitehan sa Sugbo ug ubang bahin sa nasud. Nagdumili ang LTFRB pagpahamtang sa tibuok nasud sa pasiunang P1 nga us-os sa plitehan tungod sa buwag nga petisyon ni Pe.
* * *
Matud ni Kongresista Manny Iway, ang nipasaka sa orihinal nga petisyon sa ulohang buhatan sa LTFRB, kun wa pa lang unta ang petisyon ni Pe, nakapahimus na sab unta rong Sugbo, ang iyang girepresentahan nga Negros Oriental ug ubang bahin sa nasud sa P1 nga laslas sa plitehan. Way salamat ni Pe, mahimong liwas na sa bag-ong tuig tang makatilaw sa mas ubos nga plitehan.
Gipahibawo kong Iway nga mopasaka siya og laing petisyon karong semanaha pagpaubos sa plitehan sa buses ug taxis. Masaligon siyang maaprobahan dayon tungod sa padayong pagbarato sa lana. Hinaot nga mangiyugpos lang si Pe ug pasagdan ang mas suhito nga si Iway pagpanalipod sa interes sa mga pasahero.
- Latest
