EDITORYAL - Angay'ng amendahan na ang balaod

Kinahanglan na g'yud amendahan ang Juvenile Justice and Welfare Act kay daghan na kaayo ang nag-abusar niini.

Ang maong balaod nindot unta og katuyuan, ang pagproteher sa mga menor de edad sa criminal liabilities sama sa pagkapriso kun makalapas sa balaod kay wala pa man sila sa hustong pangisip.

Apan grabe na ang pag-abuso sa maong balaod. Sama na lang sa nabalita nga gwapa nga nang shoplift ug wala nibayad sa usa ka resort human kini mi-estar didto. Ang maong babaye usa ka menor apan klaro man nga nakasabot kini sa iyang gibuhat.

Unang gituohan nga ang babaye usa ka kleptomaniac, nga dili niya mapugngan ang pagpanguha og mga butang kay aduna siya'y sakit. Apan duna'y usa ka doktor nga gi-interview sa usa ka lokal nga TV news nga miingon nga ang babaye aduna'y behavioral problem ug dili kini sakit. Matud pa sa doktor, ang babaye nangita lang og atensiyon. Bisan pa og menor de edad ang babaye, gipasakaan kini og kaso sa usa sa iyang mga biktima. Atangan na lang nato kon mopadayon ba ang kaso.

Ang pag-abuso sa Juvenile Justice and Welfare Act makita usab sa negosyo sa drugas. Kay wala man lagi'y criminal liability ang mga menor, sila na karon ang gigamit sa pagpamaligya og drugas.

Bisan sa snatching, klaro sad ang pag-abuso sa balaod. Gigamit ang mga bata sa pag-isnatch kay dili man kini sila dakpon sa kapolisan. Duna'y mga higayon nga panghipuson ang mga bata apan buhian ra human ipatawag ang mga ginikanan.

Nindot unta ang tuyo sa balaod apan di na pud maayo ang paggamit niini aron lang makalusot ang mga aduna'y daotang tuyo.