Ang benepisyo sa pagsayaw

Ang pagsayaw maoy ekspresyon sa kahinangop ug kalipay sa maayong pagdawat, isip pagrespeto sa halangdong bisita. Mahimo sad ning timaan sa kalamposan o kadaugan. O kaha, usa sab kini ka paagi sa selebrasyon o pagsaulog. Senyales usab kini sa usa ka kawsa o panawagan. Labaw sa tanan, usa sab kini ka rituwal sa pagyukbo ug paghalad sa gamhanan nga spirituwal.

Apan karon sagad, gihimo ang pagsayaw aron ang kaugalingon malingaw. Sa pagpakita usab sa katakos sa sosyal nga pakiglambigit. Pagpakighugoy ug pagpawala sa kalaay. Nahimo na lang kining yano nga kalihokan ni bisan kinsa ang pagsayaw. Apan sa laing bahin sa modernong panahon, kining pagsayaw maoy labing maayo nga hugopan nato nga buhaton, tungod sa mga benepisyo nga kapuslan gayud sa tanan, gikan sa bata ngadto sa mga edaran.

Kay nadiskubrehan nga kining sayaw maoy labing luwas og epektibong ehersisyo. Paugnat kini nga dili pakusog, nga mag-agad lang sa masarangan sa lawas.  Mahimo  bisag mag-inusara. Wala na kinahanglana nga magtuon ka pa og pormal nga sayaw. Aron madasig sa pagsayaw, mas maayo duyogan sa musikang ganahan nimo. Imo lang paminawon ang tempo sa paglihok. Himoa gayud nga ang tanang parte sa lawas mapalihok mo sa kilas nga pagkiaykiay, nga sama sa makitang baylerina nga puwerti gyung lihokana.