Iskolar nang Bayan Daghan

Daghan unyang kabus nga kabataan ang makabenepisyo sa bag-ong napirmahang balaod ni Presidente Benigno Aquino III nga Republic Act 10648, o Iskolar ng Bayan Act of 2014. Kahayag kini alang sa mga angayan ug takos nga kabataan gikan sa mga kabus nga pamilya aron sila mahatagan og kahigayonan pagkab-ot sa ilang mga damgo.

Ang RA 10648 gitipo nga House Bill 4860 ug Senate Bill 2275  sa 16th Congress ubos sa liderato nila ni Senate President Franklin Drilon ug Speaker Feliciano Belmonte Jr.

Mandato sa maong balaod nga ang tanang state universities and colleges (SUCs) kinahanglang modawat ug mohatag og scholarship grants sa mga bata gikan sa public high school sa nasud nga naa sa top ten sa ilang klase. Ang nakanindot sa maong balaod kay kun molapas og 500 ang graduating class sa usa ka  public high school  dunay usa ka dugang scholarship slot sa SUCs.

Maayo lang unta kini kun dili lang kutob sa balaod, kinahanglang dunay dugang pundo nga igahin sa mga SUCs tungod kay maapektahan usab ang scholarship sa nag-una nang mga nagtungha sa kolehiyo.

Sa unang tuig sa paglingkod ni Aquino  misinta ang mga estudyante sa public universities tungod sa pagsaka sa tuition fees apan kakulang sa mga pasilidad nga sa kinatibuk-an nakaapektar sa kalidad sa edukasyon.

Maayo na lang nga gihatagan og pagtagad ang sector sa edukasyon ug karon sila maoy usa sa dunay labing dako og pundo karon.

Ang kabataan kaniadto mao na karon ang nagpadagan sa ekonomiya ug kalamboan sa nasud lakip na ang salawayong ilang nahimo.

Ang kabataan sa henerasyon karon mao na usab unya’y umaabot nga modala sa nasud, kung unsang kalidad ang ilang edukasyon karon adto na makita napulo ngadto sa 20 ka tuig gikan karon.