EDITORYAL – Sexual harassment

Ang pagkakonbikto sa kanhi regional direktor sa National Economic Development Authority (NEDA) sa kaso nga sexual harassment nga gipasaka sa iyang subordinate division chief magsilbe nga leksiyon sa mga opisyal sa kagamhanan.

Namatud-an sa Sandiganbayan nga si kanhi NEDA-7 Regional Director Jose Romeo Escandor sad-an sa gipasaka nga kaso batok kaniya kay gihatagan og gibug-aton sa mga justices ang reklamo sa babaye nga kawani sa NEDA.

Nanguyab si Escandor ngadto sa iyang division head ug usahay mogunit kini sa kamot sa babaye atol sa ilang mga meeting ug may mga gabii nga mopadala kini og text messages nga kuno siya gimingaw ug gusto siya’g sexual relationship ngadto sa babaye’ng kawani.

Sigurado nga daghan kaayo kini’ng mao nga sitwasyon diha sa ubang mga ahensya sa kagamhanan ug sa mga pribado’ng kompaniya.

Ang pagkonbikto sa Sandiganbayan ni Escandor magsilbe nga pagtulon-an sa ubang mga kawani nga babaye nga gihimoan usab og susama nga pag-abuso sa ilang mga boss.

Nagpasabot kini nga ang balaud kusganon nga nagdili sa pag-abuso sa kababayen-an nga binuangan lang sa ilang mga boss ug pugson nga muhatag sa ilang demanda.

Isip mga kawani sa kagamhanan, sila unta maoy magsilbe nga sumbanan sa katawhan apan imbes magtinarong, gibuling-bulingan nila ang dungog ug pagsalig sa publiko kanila.

Apan dili mahunong kini’ng hiwi nga binuhatan sa pipila ka opisyal kun ang mga hingtungdan wala’y kaisog sa pagtug-an ingon man pagreklamo sa mao nga pagpangabuso.