Kinsa ang labing kurakot nga opisyal sa gobiyerno?

Sa gipalabang nga budget sa nasud karong tuiga, gikataho nga wala gayud mahingpit ang pagkawagtang sa katahap nga gisukip pa gihapon ang susama sa kontrobersyal nga Priority Development Assistance  Fund (PDAF).

Ang binilyon ka pesos nga PDAF nabulit na sa daghang buling sa mga mata sa katilingban kay napuno man kini sa mga pasangil nga dako’ng kantidad niini gikawkaw sa ubang mga magbabalaud ug gigamit sa pagpaburot sa ilang kaugalingong panudlanan.

Tungod sa dili maayo’ng paggamit sa PDAF sa pipila sa atong mga magbabalaud, daw wala lang usab damha sa mabuot nga katawhang Pilipinhon nga nahimugso usab ang iyang kaluha – ang gitawag og Development Acceleration Fund (DAF) nga iya sa presidente.

Gumikan kay ang PDAF naduhigan man sa anomaliya misangpot kini nga gipaundang na sa pagpatuman human ideklarar sa Korte Suprema nga usa ka ilegal.

Unsaon, imbes ang kuwarta gamiton alang sa mga proyekto nga makahatag unta og kaayohan sa katawhan, nahipunta na man hinuon sa bulsa sa mga senador nga gipriso karon nag-atubang na og kaso.

Daghang mga proyekto nga kunohay gigastohan sa kuwarta gikan sa PDAF apan wala kini mapatuman.

Kun aduna may mga proyekto nga napatuman, dili usab mahanaw sa huna-huna sa katawhan nga may mga opisyal nga nakadawat og Standard Operating Procedure (SOP) nga 10 porsiyento sa kantidad sa proyekto.

Ug kun tinuod man gani ang SOP nga 10 porsiyento sa matag proyekto unya mahipunta kini sa mga politiko, aw adunay kahigayonan nga mabahinan niini ang mga kabus kay daghan man ang mangayo kanila og hinabang.

Apan kun mahiadto ang 10 porsiyento nga SOP sa mga Cabinet Secretary o mga tinudlo nga direktor sa rehiyonal nga buhatan labing siguro nga mopaingon ra kini sa ilang mga bulsa kay ang mga kabus dili man manuktok sa ilang pultahan sa pagpangayo’g hinabang.

Gumikan niini daghan karon ang nakapangutana kun si kinsa man ang labing kurakut nga opisyal sa gobiyerno?  Ang mga politiko ba o ang mga tinudlo nga opisyal sa presidente?