Wala’y pinugsanay
“Wala’y utang ang gobiyerno sa mga senior citizens.” Tinuod kini’ng komentaryo sa usa ka kawani sa Cebu City Hall kinsa napungot sa pagpunay’g paabot sa mga senior sa dawatunon nila gikan sa kagamhanan sa siyudad.
Sa pagkakaron may P5 mil pa nga dawatunon ang mga senior gikan sa P12 mil nga gisaad ni Mayor Michael Rama nga ihatag kanila niini’ng tuiga.
Wala mangayo ang mga senior niini, apan kinasingkasing kining gitanyag ni Mayor Rama niadto’ng mikandidato siya sa piniliay sa tuig 2013.
Dili mga bata nga wala’y buot ang mga senior nga mahimo ra nimo’ng ugma-ugmaon sa imong isaad nga ihatag kanila.
Tungod kay mayor ang misaad, gituohan sa mga tiguwang nga matinud-anon ug dinagko’ng tawo ang maong mga saad ug dili binata. Busa puno sa pagtuo ug paglaum nga tinud-anay ang maong mga saad ug gipaabot kini sa mga senior kanunay.
Bahin sa donasyon sa pagtukod og bag-ong Cebu City Medical Center (CCMC) building nga gisugyot sa kagamhanan ngadto sa mga senior, dili angay sawayon kadto’ng dili modonar.
Ang donasyon usa ka boluntaryo nga paagi diin kun mohatag ka maayo, ug kun dili ka mohatag, maayo ra gihapon.
Kadto’ng misaway sa mga tiguwang kay giisip nila’ng hakog ra kaayo sa pagpaabot niini sa ilang madawat gikan sa gobiyerno, hinaut unta nga dili na lang sila muabot sa pangedaron nga senior citizen kay gipakita nila nga wala sila’y gusto nga mudawat sa kaayohan gikan sa gobiyerno.
* * *
- Latest
