Duha ka seminar
Usa sa giatangan namong bahin sa Grand Halad sa Kapamilya niadtong Sabado mao ang buwag nga seminars nga giduma nilang Cebu City Mayor Mike Rama ug kanhi mayor Tommy Osmeña: Si Rama nag-seminar og Event Management, nga naglakip sa iyang pagduma sa tinuig nga Sinulog Grand Parade; samtang si Osmeña nag-seminar og Speed Reading, nga niawhag sa mga nanambong pagtul-id sa sayop nga paagi sa pagbasa nga gitudlo sa mga eskuylahan.
Gituyo namo nga di sila mag-abot. Ang seminar ni Rama gihimo sa alas-9 hangtod sa alas-11 sa buntag. Ang kang Osmeña nagsugod sa ala-1 hangtod sa alas-3 sa hapon. Nipataliwa nilang seminar ni DYAB Anchor JT Benz nga How to Top the Bar Exams.
* * *
Apan ambot tungod ba kaha sa kakuwang sa among plugs, o sa kadaghan sa kalihokan sa labing dakong piyesta sa libreng mga pangalagad sa Sugbo, o sa kasudlunon sa venue, o sa kapakyas pagbutang og signage, mingaw pang air-conditioned nga Roco Hall pag-abot ni Rama.
Nagdalidali mi og rekurida libot sa main campus sa Cebu Technological University (CTU) pagpahibawo sa seminar sa mayor. Sa kasamtangan, nidalikyat si Rama sa lain niyang kalihukan sa Ramos. Inanay’ng napuno ang venue dihang nakabuylo nang seminar. Wa na mi maproblema pagpanawag og manambong sa seminar ni Osmeña.
* * *
Pipila sa among nakat-unan sa seminar ni Rama: Magsugod sila’g plano unom ka buwan sa di pang Sinulog, may 64 ka kahon sa table of organization pagduma sa Piyesta Senyor, angay’ng mangonsulta aron makakuha sa labing lapad nga suporta, balikbalikon pagsusing listahan sa tanang panginahanglan hangtod sa mikropono ug freshener ug di siya muinom sa tibuok adlaw sa Sinulog hangtod sa tungang gabii.
Pipila sa gitudlo sa seminar ni Osmeña: Sayop ang pag-grado sa mga tinun-an pinasikad sa pagbasa og kusog atubangan sa klase, mas paspas ang pagbasa sa hilom, linaktawan ang wa kinahanglanang kasayuran ug nakatabang nig dako sa iyang pagsubli sa mga dokumento nga nagbaha matag adlaw sa iyang buhatan dihang mayor pa.
* * *
Gihangop sa mga nanambong sa seminar ni Osmeña ang pagpalihug sa iyang anak pag-asoy giunsa pagka summa cum laude sa UCLA bisan naapektahan sa iyang operasyon sa kanser niadtong 2009. Tulo ka sekreto ang gitug-an ni Miguel:
Duha ka ballpen ang gigamit sa notes sa lectures sa mga magtutudlo--blue alang sa nasabtan ug green sa wa masabti--ug matag human sa klase nangutana sa mga magtutudlo parte sa mga nasuwat sa green;
Ang labing maayo niyang trabaho nahimo sa alas-4 sa kadlawon, maong natug siya og alas-7 sa gabii ug nimata og alas-3 sa kadlawon aron mas mabungahon ang iyang pagtuon; ug
Wa ipaubos ang damgo pagkuha sa labing taas nga grado bisan kinahanglang makig-uban sa mas taas nga panahon sa masakiton niyang amahan.
* * *
- Latest
