EDITORYAL - Mga mendicants gipasagdan

Pasko na g’yud. Mianam usab kadaghan ang mga bata nga anaa sa karsada mangayo’g kuwarta gikan sa mga motorista ug sa mga sumasakay sa mga jeep ug taxi.

Hain na man ang mga sakop sa Task Force Anti-Mendicancy sa dakbayan sa Sugbo? Ngano’ng wala man nila panghiposa ang mga bata nga anaa magyampungad duol sa SM City Mall?

Dunay bata’ng lalaki nga apil sa mangayo og kuwarta nga tingali utso-anyos ang pangedaron ug kaniadto’ng Sabado sa gabii nagkugos kini og bata nga yagpis kaayo og lawas, wala’y sinena ang iyang gikugos.

Klaro kaayo nga gipasagdan ra kini sa iyang ginikanan kay kun tarong lang og pangisip ang inahan o amahan sa maong bata mangita g’yud siya kun hain na ang iyang anak.

Kay linghod pa man kaayo ang pangisip sa maguwang nga nagkugos sa bata, dili imposible nga kun dili makabantay ang drayber ug madam-agan ang mga bata, problema kini sa drayber.

Kanunay’ng magpasiatab ang mga opisyal sa kagamhanan nga kadto’ng mga mapasagaron nga ginikanan ila’ng ig-on sa balaod kay ang pagpasagad nila sa ilang mga anak kalapasan na sa Child and Youth Welfare Code.

Apan hain na man ang mao nga pasalig? Pipila ka adlaw gikan karon, ang Cebu City Anti-Mendicancy Task Force mopatawag na usab og press conference ug mangangkon nga aduna sila’y gihimo sa mga nagpakilimos, bisan og wala.

Mao kini ang usa sa mga opisina sa kagamhanan nga maisip nga wala’y ngipon nga mopatuman sa balaod. Pik-apon tuod nila ang mga makililimos apan buhian ra ‘sab dayon.