Mora’g nakaamgo

Bilib ko sa daling aksiyon sa kagamhanang lokal sa dakbayan sa Sugbo batok sa tropikal depresyon nga si Queenie. Layo pa gani ang bagyo mideklara na ang City Hall og walay klase sa dakbayan Miyerkules sa hapon. Bisan wala direktang miigo ang bagyo dinhi sa siyudad, wala mikumpiyansa ang kagamhanan sa dakbayan. Kini tungod kay maigo gihapon ang siyudad sa kusog nga pag-ulan ug haguros sa hangin.

Tuod man milapdos ang makusog nga ulan Huwebes pa lamang sa kaadlawon sa metro ug southern Cebu. Alerto usab ang otoridad sa mga pagbaha ug pagdahili sa yuta sa mga bukirang barangay.

Kay alerto man ang tanan, andam ang matag-usa sa unsa mang trahedya sa dihang mibunok ang kusog nga ulan. Ug maayo na lamang nga walay namatay ug dakong kadaut sa kabtangan ang narekord sa otoridad dinhi sa dakbayan.

Ang kaalerto sa dakbayan sa naulahing bagyo dakong sukwahi sa nangaging mga bagyo diin mora’g nagmika ang preparasyon sa lokal nga otoridad nga miresulta na hinuon sa dako nga kadaut.

Sa nangaging panahon dugay ang deklarasyon sa kagamhanang lokal pagsuspende sa klase. Kini bisan pa man kun grabe na ka maot sa panahon. Tungod lagi kay gihuwat pa ang advice gikan sa PAGASA, magdumili usab ang lokal nga kagamhanan pagsuspende sa klase. 

Dihay usa ka higayon kaniadto nga puwerte na ka maot sa panahon apan wala gihapon gisuspenso ang klase sa kagamhanan. Gisuspenso man tuod sa katapusan ang klase apan puwerte ka kusog sa ulan ug hangin.

Ang naandan kaniadto miresulta usab sa mga dakong kadaut panahon sa bagyo.  Daghan nang kinabuhi ang nakalas ug dakong kabtangan ang nabanlas gumikan sa kakulang sa kaandam.

Dinhi sa Metro Cebu, dali lamang ang mga pagbaha bisan sa hinay nga pag-ulan. Ug dako kini nga kalbaryo sa mga Sugboanon, problema nga wala gayud makasulbad ang atong mga opisyal hangtud karon. 

Apan karon morag nakaamgo na ang lokal nga kagamhanan, ilabina dinhi sa dakbayan sa Sugbo. Aron dili na masubli ang mga insidente sa nangaging mga katalagman, alerto na kini pagpahimangno sa katawhan sa kanunay nga pagmatngon.