Weekend visitors

Nahibalo ka kamo nga naay daghang mga lumolupyo sa pipila ka mga kasikbit nga lalawigan sa Sugbo ang manganhi sa atong dakbayan matag-weekend aron maglingaw-lingaw?

Kini sumala sa usa ka taxi driver kinsa adunay daghang suki nga mga pasahero matag weekend kon katapusan sa semana gikan sa laing dapit.

* * *

Matud pa ni Erning (apelyido gipugngan) kinsa adunay duha ka buok kaugalingong taxi diin siya maoy personal nga nagmaneho sa usa niini ug ang usa maoy drayber ang iyang anak, duna diay suki nga mga pasahero gikan sa Negros ug Bohol.

* * *

Ang taga-Negros mosakay og lantsa (motor launch) tabok sa dagat ug anha manganaug sa pantalan sa Samboan o Santander. Matag Biyernes ni sila manganhi sa Sugbo ug mamauli Domingo sa kahapunon.

* * *

Ang taga-Bohol manakay ra sa regular trip sa barko nga anha modunggo sa Pier Tres ning atong siyudad. Wa sila’y laing tuyo kun dili mao ra ang paglingaw-lingaw o banding-banding sa ilang pamilya diha sa mga kan-anan sa mga shopping mall o ba kaha sa mga nightclub.

* * *

Daghan sab kanila ang moderetso sa casino sa Lahug o didto sa Mactan. Samtang nia sila sa Sugbo ang mga suking pasahero sa taxi ni Erning ug sa ilang anak anha mo-overnight stay sa suki sab nilang pension house o mga gagmay’ng hotel (dili motel).

* * *

Suma pang Erning, naa say ubang taxi drivers nga duna say ilang suki nga pasaherong mga weekenders. Ganahan kuno silang makasuki og ilang gitawag nga weekenders tungod kay mga galante sa tip labi na kadtong moderetso ug magpapik-up sa casino.

* * *

Daghang salamat ngadtong Erning, ang taxi driver nga atong tinubdan niining atong estorya.