Kayo wala’y pilion

Wala ko malimot nga akong nahisgutan dinhi sa akong lindog ang kabahin sa pag-prevent sa kitchen fires.

Gani naghatag ako og mahinungdanon nga mga safety tips kabahin sa maong topic. Apan sa wala lang nako damha, hapit masunog ang akong kaugalingon’g panimalay gumikan sa pagpabaya sa pagluto sa kusina.

Dili g’yud diay garantiya nga kun bombero ka luwas na sa sunog. Nahitabo kini diha’ng ang sakop sa akong pamilya nga nagprito og sud-an gibiyaan ang iyang giluto kay adunay laing giatiman. Pila lang gani ka minutos gikan sa iyang pagbiya sa kusina miulbo na ang kayo.

Maayo na lang gani kay diha ra ako sa panimalay niadto’ng higayona ug dali nako nga gitabonan ang nagsiga nga kaha ug napalong lang dayon ang kayo.

Apan nakamugna kini og baga nga aso nga nagpuot sa among panimalay ug nangalisang ang tanang sakop sa akong pamilya sa maong panghitabo.

Unsa may leksyon nga makuha niadto’ng mao nga kasinatian? Una, kinahanglan nga kun magluto kita angayan g’yud kini nga atong bantayan hangtud nga mahuman ang pagluto.

Ikaduha, taboni ang nagsiga nga kaha ug ayaw bubo-i og tubig kun musilaob ang kayo. Labing maayo nga tabonan og basa nga panapton nga igo makatabon niini.

Ang ikatulo, ipalayo g’yud ang mga butang nga dali masunog duol sa inyong lutoanan, bisan pa man og nahuman na kamo og luto ug napalong na ninyo ang inyong gilutoan. Ang inyong kabumberohan manghinaut nga unta inyong timan-an ang among mga pahimangno ug hatagan og igong pagtagad.