Barko gi-hold sa customs, ‘Col. Karingal’ interesado

Ang kaso nga libelo giisip namong mga sakop sa media nga usa ka sundang nga nagbitay ibabaw sa among ulo nga kun ang usa ka tawo, kalagmitan mga badlongon ug hanggaw nga mga opisyal sa gobiyerno, masuko sa among masulti sa kahanginan o masulat sa pamantalaan, mahulog kini ug kami ang mag-antos.

Apan kining libelo dili angay gamiton sa mga salawayon ug badlongong opisyal aron pahilomon ang mga sakop sa media nga nagbantay sa ilang mga binuhatan. Gani, ang mga opisyal nga gitawag og “onion-skinned” nga kun sawayon dali kaayong masuko giawhag man sa pag-undang na lang sa pangalagad sa gobiyerno kun dili nila maagwanta ang pagsaway.

Kun nagtuo si Talisay city administrator nga mangundang na lang og lapdos sa iyang binuhatan ang mga sakop sa media niining iyang pagkiha og libelo kang Gabriel Bonjoc, nasayop siya.

Bisan kinsa nga mga opisyal nga nangaraan na diha sa Talisay makasulti unsa siya nga klaseng pagka-administrador sa siyudad nga hasta na gani ang iyang amahan nga si Mayor Johnny V. delos Reyes nga maoy nag-appoint kaniya sa posisyon iya man nga supakon.

Maayong ipanawong kang John Yre nga sa wala pa mapili iyang amahan isip mayor, wala gyud siyay kabangkaagan sa panggobiyerno. Ug ang iyang qualification mao ra gyud ang pagsalig sa iyang amahan nga mayor.

Ang gikasakit ni John Yre mao nga gibalikbalik ni Bonjoc ang pag-ingon sa programa niini sa radio nga mohunong lamang siya og bira kaniya kun moundang kini sa iyang pagka-opisyal. Unsa may ikasakit ni John Yre nga sakto man si Bonjoc? Kun dili maagwanta ang pagsaway nganong dili man siya moundang sa iyang trabaho, nga ang pagsaway tipik man kana sa “hazard.”

* * *

Adunay barko nga gi-import ang Racal Motor Philippines nga gi-hold sa Bureau of Customs Port of Cebu bisan nakabayad na kini sa duties and taxes.

Ang barko nga gikan sa China na-release na sa customs niadto pang Oktubre 24, apan sa dihang gibalhin kini sa tag-iya niini gikan sa pribadong yarda sa Tayud, Consolacion paingon sa kaugalingon nilang yarda sa Bacong, Negros Oriental.

Apan sa dihang naabot kini didto, mirekomendar si Lt. Danielo Gonzales ngadto kang Customs District Collector Roberto Almadin nga i-hold.

Ang nakakontrobersiyal niini tungod kay nganong usa ka “Col. Karingal” sa BOC sa Manila ang interesado kaayo sa maong barko.

Kun kumpleto na ang papeles sa barko ug bayad na sa buhis, nganong i-hold pa man? Nganong interesado man si Col. Karingal niini?

Atensiyon, Ombudsman-Visayas, lili-a kuno ninyo kining kasoha.