EDITORYAL – Dako’ng lalis nagpaabot

Nindot ang gihimo ni Konsehal Roberto “Bob” Cabarrubias nga pasilotan na kadto’ng mga tag-iya og motorsiklo nga magmaneho og hilabihan ka saba nga tambutso.

Ang problema lang kay kini nga ordinansa lisud kaayo ipatuman ug hayan makamugna og lantugi tali sa mga motorista ug sa mga traffic enforcers.

Adunay gilatid nga gikusgon sa kasaba sa makina sa motorsiklo, apil usab sa ubang mga sakyanan, apan ang gikusgon dili masukod base lang sa atong pagpaminaw.

Susama ra sa pagbuga og aso sa mga sakyanan nga usahay atong matan-aw nga subra na kaayo ang aso nga gibuga, apan ang pagsukod niini gigamitan g’yud og kahimanan. Kini maoy rason nga sa pagrehestro sa sakyanan isumiter gayud kini og smoke emission test. Sa ato pa, labaw na nga ang pagsukod sa kasaba sa tambutso magkinahanglan og gadget.

Mahimo ba gud kini pinaagi lang sa pagpaminaw sa traffic enforcers nga kadaghanan wala gani masayud kun pila ka decibels ang gidili sa balaod?

Kun tininuod g’yud ang kampanya sa kagamhanan pagdakop niini’ng mga motorista nga motuyo pagtaud og saba kaayo nga tambutso, magpalit gayud sila og kahimanan nga gamiton pagsukod sa tingog, dili kay ibase lang sa dunggan sa mga traffic enforcers.

Apan wala man gani makadakop ang mga traffic enforcers sa mga sayon kaayo nga dakponon, kini pa kaha nga pagdakop sa mga drayber sa motorsiklo nga saba kaayo’g tambutso ang ilang mapatuman?