Geolocation pangkontra krimen

Gilauman nga mapalapdan ug mapakusgan pa ang kampanya sa kapolisan batok sa mga krimen sa tibuok nasud.

Kini human gilusad ni DILG Secretary Mar Roxas ang bag-o ug hi-tech nga sistema pagsumpo sa krimen didto sa kaulohan.

Ang bag-ong sistema gitawag kini og GEOLOCATION. Ang Geolocation sigun sa pagpasabot sa kapolisan usa ka matang sa incident report form nga giingong makakita ug makatultol sa nahimutangan sa tawo o kriminal pinaagi sa digital information via internet.

Pinaagi sa geolocation ang matag presento sa kapolisan aduna na unya’y statistician nga ibutang aron maoy mogiya nga matultolan ang lugar nga luklokanan sa mga kriminal ug aron makahimo ang kapolisan og epektibong paagi pagdakop.

Sa gidaghanon sa krimen nga nahitabo sa bisan asa nga dapit sa nasud diin ang uban wala pa mahatagi og kasulbaran, atong gihangop kining geolocation nga nahuna-hunaan ni Secretary Mar Roxas sa pamasin nga mamenus-menosan ang gidaghanon sa krimen sa nasud nga wala pa mahatagi og kasulbaran.

Kun ang geolocation abag sa kapolisan sa pagpamenus ug pagsumpo sa krimen, mas maayo’ng ipatuman kini lukop nasud inay kay didto ra sa kaulohan.