Laing isyu ni Binay

Napun-an ang mga isyu nga giatubang ni Vice President Jejomar Binay ug kun dili niya kini matubag pag-ayo sigurado nga motibuksok ang iyang tinguha nga mahimo’ng sunod nga presidente sa nasud.

Ang laing “expose” ni kanhi Makati City Vice Mayor Ernesto Mercado mao nga daghan og unit si Binay sa mga dagko’ng condominium project sa Makati apan gipaangkon lang og laing tawo, dili usa ka yano nga isyu.

Sayonan ka nga ang pasangil ni Mercado mao nga si Binay mangayo og usa ka unit sa condominium gikan sa mga tag-iya diha’ng mayor pa siya sa Makati bugti sa pagpadali sa pag-aprobar sa mga permiso.

Kini kuno maoy rason nga si Binay nakapanag-iya og unit sa mga dagko nga condominium projects sa Makati.

Gitug-an kini ni Mercado diha nga miatubang siya sa nagpadayong hearing sa Senate Blue Ribbon Sub-committee kabahin sa giingon nga kurapsyon nga naglambigit ni Binay kaniadto.

Kun ako pa ni Binay, atubangon niya ang Senate Blue Ribbon Committee kana kun dili man tinuod ang pasangil batok kaniya. Apan kun tinuod man gani ang gibutyag ni Mercado, magpanuko g’yud si Binay kay basin og moresulta pa kini og laing mga expose.

Ang imbestigasyon karon gitumong ra man g’yud unta sa giingon nga “overpricing” sa pagpatukod sa Makati Parking Building. Unsaon nga imbes moatubang si Binay sa Senado, moanhi man hinuon sa Sugbo ug makig-uban og kaon nga magkinamot sa iyang mga dumadapig.

Ang kasayuran nga gibutyag ni Mercado didto sa Senado mao nga mata’g unit sa condominium ni Binay adunay mga tawo nga gibutang niya isip “dummy” nga moangkong maoy tag-iya.

Usa ka unit sa The Peak Condominium nga giingong nagkantidad og P18 million gipuy-an sa usa ka Ariel Olivar, ang giingong surveyor sa Hacienda Binay didto sa lungsod sa Rosario, Batangas.

May lain ‘sab kuno’ng unit sa Le Triomphe Condominium sa Salcedo Village nga ang gibutang nga dummy mao ang uyoan sa asawa sa bise presidente.

Kinahanglan g’yud nga tubagon nimo kini Vice President Binay kay aron ang katawhan dili mosamot sa pagyamiid kanimo, dili kay igo ka lang makigsawo og kaon sa mga tawo.

Ayaw g’yud pagtuo nga ang mga tawo nga nakig-uban nimo sa boodle fight pulos imong mga dumadapig kay ang uban diha gusto lang nga motan-aw nimo kun wala ka ba mag-inartista.

Ako, isip nagtubo sa bukid, makaila g’yud kun ang usa ka tawo anad ba nga mokaon nga magkinamot.