EDITORYAL - Gahom sa Ampatuan clan

Nobiyembre  23, 2009 nakurat ang Pilipinas ug ang tibuok kalibotan sa makalilisang nga Maguindanao Massacre.

Karong adlawa mao ang ika-5 ka tuig nga kasumaran sa maong linoog nga krimen nga nagpakita lamang sa kawalay respeto sa kinabuhi sa pipila ka mga tawo nga gihatagan og gahom.

Sud lang sa pipila ka minutos, 58 ka tawo ang gipamatay didto sa Sitio Masalay, Salman, sa lungsod sa Ampatuan, Maguindanao  sa maong dapit  usab unta suway taguon ang krimen pinaagi sa paglubong sa mga biktima apil na ang ilang mga sakyanan.

Salamat na lang kay bisan unsa pa ka gamhanan ang mga Ampatuan, mi-leak ang maong krimen ug diha-diha nikatap ang balita.

 Traynta’y otso sa mga biktima pulos mga tigbalita nga igo lang unta mihimo sa ilang trabaho aron paghatud og kasayoran ngadto sa publiko bahin sa makasaysayanon untang hitabo nianang adlawa.

Kini ang pagsang-at og kandidatora sa kasamtangan karong gobernador sa Maguindanao nga si Gov. Ismael “Toto” Mangudadatu.

Apan inay nga sila maoy magbalita, sila maoy nabutang sa balita nga mapatik sa kasaysayan. Tungod sa ilang kamatayon nayagyag ang tinud-anay nga dagway sa politika sa Maguindanao.

Daghan pang mga probinsya nga naglabaw ang gahom sa usa lang ka political clan ug walay bili kanila ang balaod, ang kinabuhi sa uban basta magpabilin lang sila sa ilang pwesto.

Lima ka tuig na ang nilabay apan ang gahom sa Ampatuan clan pabiling naghari tungod kay wala pay hustisya nga nahatag ngadto sa mga biktima.

Niadto adlaw nga Biyernes, usa ka Santos nga Misa ang gihimo sa lugar diin nahitabo ang masaker.

Hapit nang mapupos ang termino sa gobiyernong Aquino, apan ang hustisya nga iyang gisaad hain na man? 

Pila pa kaha ka mga “Nobiyembre 23” mosinggit ang katawhan og hain na ang hustisya alang sa 58 ka mga biktima?