Boodle fight walay epek

Nag-leave ko sugod niadto’ng Lunes mao nga wala kaayo ko makabantay nga mianhi diay pagbalik sa Sugbo si Vice President Jejomar Binay ug sama sa naandan – nakig-“boodle fight” na ‘sab.

Samtang nagbasa ko sa mga balita ug sa lindog sa mga mantalaan sa kaulohan, nakaingon ko nga husto g’yud ang pangutana sa kadaghanan. “Makalahutay kaha si Binay sa pagpahigayon og boodle fights hangtud sa eleksyon sa 2016?”

Nagtuo g’yud tingali si Binay ug ang iyang mga campaign managers nga mahanaw sa huna-huna sa katawhan ang mga isyu nga gipasangil batok kaniya pinaagi sa pagpahigayon og boodle fight, kun pakig-uban sa pagkaon nga magkinamot.

Ang makapahanaw sa pagtuo sa katawhan nga tinuod nga nakahimo’g sala si Binay base sa pamasangil kaniya sa iyang mga kontra sa politika mao ang pag-atubang sa imbestigasyon sa Senado ug ang pagpasabot niini sa katawhan pinaagi sa media.

Nakadungog ko nga adunay mga higayon nga si Binay kun magpa-interview sa radyo, sama sa ubang presidente, nga ang iyang mga staff mokuha daan sa pangutana ug pilion ra ang iyang tubagon.

Dili basta-basta kini’ng isyu nga gipasangil kang Binay. Sayonan ka nga ang pasangil nakakuwarta si Binay og milyon-milyon sa pagpatukod sa Makati City Parking Building.

Adunay nangutana kanako kun ngano nga imbestigahon man kuno si Binay pananglit iya ang 350 hektareyas nga kayutaan nga adunay upat ka mansion ug aircon nga baboyan sa Rosario, Batangas.

Akong gipasabot ang nangutana kanako nga kun iya gud na ni Binay mao nga lapad kaayo nga hacienda, kwentahon kana kun giunsa niya pag-angkon ang mao nga katigayonan ug kun ngano nga wala kana ibutang sa iyang Statements of Assets, Liabilities and Networth.

Diha pa nakasabot ang mao’ng tawo. Daghan hinuon ang nakasabot nga si Binay angayan gayud nga mohatag og katin-awan ngano nga mahal man kaayo ang pagpatukod sa Makati City Parking Building?

Kun ako pa ni Binay, kay nangambisyon man g’yud siya pagka presidente sa nasud, kinahanglan nga limpyohan niya ang iyang ngalan pinaagi sa pagtubag, punto por punto sa mga isyu. Dili kay magpahigayon lang og boodle fight kay wala g’yud na’y epek.

Gani makita man nimo nga mius-os pag-ayo ang iyang popularity rating. Dako’ng bakak ang giingon sa uban nga wala maunsa ang kapopular ni Binay. Sa mga survey nanaog ang iyang popularity rating. Nagpasabot nga daghan na ang wala ganahi kaniya.