Sa piyesta sa Birhen sa Regla

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Ang kalangan sa pagbiyahe sa mga sakyanan gikan sa Dakbayan sa Lapu-Lapu o paingon sa amihanang bahin nga kalungsoran sa lalawigan sa Sugbo maoy nahimong epekto sa gipatuman nga proyekto nga gigahinan sa nasudnong kagamhanan pinaagi sa Department of Public Works and Highways (DPWH) Region 7.

Matud pa nila nga labi pa gayod nga masinati ang maong suliran karong Huwebes nga maoy adlaw sa kapistahan karong tuiga sa Birhen sa Regla nga maoy patron sa Dakbayan sa Lapu-Lapu. Gitataw nila nga naandan nga suliran sa trapiko sa adlaw sa kapistahan sa maong dakbayan sa nangagi pang katuigan bisan pa kun niadtong panahona wala’y proyekto sa kadalanan ang DPWH.

Dugang pa nila nga naandan na nga kahimtang sa maong dakbayan sa matag tinuig niining pangilin ang pag-ambahan sa mga bisita ug mga deboto sa milagrosang patron sa dakbayan nga makaingon sa panaghuot sa kadalanan.

Ang mga Oponganon miingon nga kaniadto sa nangaging katuigan  daan na nga masinati ang panaghuot sa kadalanan sa panahon sa tinuig nga pangilin sa dakbayan.

Kini ang hinungdan nga ang mga mamista nga gikan sa laing lugar nga naglakip na sa taga amihanan ug habagatang kalungsoran sa lalawigan mapugos na lamang sa pagbaklay tadlas sa taytayan sa Mactan ug sa Dakbayan sa Mandaue na mangita og taxi o PUJ nga kasakyan.

Sumala pa  nga ang dugang taytayan nga Marcelo Fernan Bridge ug mga ferry boat sa Mulle Osmeña nga mahimong alternatibong kaagian sa mga bisita ug mga deboto  dili pa gihapon kini paigo sa pagsulbad sa suliran sa trapiko.

Ang  kahimtang sa nangaging kasaulogan sa matag Nobiyembre 19 ug 20  nga maoy adlaw sa tinuig nga pangilin sa dakbayan maoy ilang hipanglantawan ang grabe pa nga masinati nga suliran sa trapiko sa maong lugar tungod  nagdasok na man daan ang daghang mga tawo sa dakbayan nga nagpuyo sa subdivision ug mga trabahante sa nagkadaiyang  establisamento nga Mactan Processing Zone (MEPZ) ug uban pa.