I-apil pagpriso ang namasangil

Nagpusot-pusot ang mga pasangil ni kanhi Makati City Vice Mayor Ernesto Mercado batok kang kanhi Makati City Mayor ug karon bise presidente sa nasud Jejomar Binay. Ang mga pasangil nagsugod sa pagpaburot sa prisyo sa pagpatukod sa Makati City Building, cake para sa mga senyor citizens, Science School building, hacienda Binay sa Rosario, Batangas ug condominium bugti sa daling pagproseso sa mga proyekto nga gisudlan sa mga kontraktor sa Makati City. Ang kanhi bise mayor hugtanon nga mibarog sa iyang mga pasangil batok sa bise presidente ug miangkon nga aduna siyay direktang kasayoran niini.

Ang kanhi bise mayor gidayig sa mga kritiko sa bise presidente ug gidawat isip gospel truth ang iyang gipangbulgar ug kini atong nakita basi sa lihok sa mga senador ug sa ilang mga dumadapig. Ang mga senador ug ang mga kritiko sa bise presidente gustong mataral siya sa hukmanan ug masilotan sa mga nahimong kasaypanan. Apan ang bise presidente lang ba ang silotan?

Kun ako ang inyong pangutan-on akong apilon sa pagtaral sa hukmanan si kanhi bise mayor Ernesto Mercado tungod kay pariha sila sa bise presidente sad-an sa paglimbong sa pagsalig sa katawhan sa Makati. Ang kanhi bise mayor wala mobulgar sa mga kahiwian nga iyang nasayran sa panahon sa pamunoan sa kanhi mayor ug karon bise presidente sa nasud dili tungod kay supak siya sa pamuno nga puno sa mga paglimbong kun dili tungod sa iyang personal nga interest. Ang pagbulgar ni Mercado sa mga kahiwian sa pamunoan ni Jejomar Binay dili bunga sa iyang pagpakabana batok sa kahiwian kun dili bunga kini sa iyang kalagot ngadto sa bise presidente nga wala motuman sa saad niini nga himoon siyang mayor sa Makati City.

Kun gihatag pa sa mga Binay ang Makati City ngadto kang Mercado magpabilin gayod untang sekreto ang mga pasangil batok sa bise presidente. 

Ang kapakyas ni Mercado sa pagbulgar sa iyang unang nahibaw-an nga anomaliya mao ang hinungdan sa pagdaghan pa sa mga anomaliya nga gisudlan sa bise presidente busa angayan ug matarong lamang gayod nga i-apil siya sa pagtaral.