Komisyon

Angay’ng ipasabot sa kadagkoan sa Department of Public Works and Highways (DPWH) kun ang gitrabaho nila nga drainage system sa tiilan nga bahin sa Veterans Drive tumoy sa Gorordo Avenue makasulbad ba sa baha diha’ng dapita.

Alang kanako, sayop ang mao nga proyekto ug dili kini makasulbad sa pagbaha diha sa eskena nga maglisud ang mga sakyanan pag-agi kun kusog ang uwan.

Puwerte’ng kusoga sa baha diha sa eskena nga ang karsada nga gikan sa Sitio Sun-ok, ang upper portion sa Lahug kanang kilid sa Aderan Hotel, mahimo na nga daw sapa sa matag higayon nga adunay kusog nga uwan.

Matag higayon nga mokusog ang uwan ug mahisama na sa sapa ang karsada, mosul-ong usab dayon ang kabuang sa ubang mga nagpuyo sa ibabaw nga bahin nga ipaanod nila ang ilang mga sinako nga basura. Gitawag nila kini og “basura-padala.”

Unsaon sa pagsulbad sa pagbaha diha sa eskena Veterans Drive-Salinas Drive ug Gorordo Avenue nga wala may kalutsan sa tubig. Maayo og gipadak-an nila’ng daan sa DPWH ang imbornal nga lutsanan sa tubig.

Apan kada adlaw anaa ko mag-agian niana’ng mao nga karsada ug suheto ko nga wala’y pagpadako sa imbornal nga kalutsan sa tubig nga gikan sa ibabaw’ng bahin.

Bi, palihug kuno ko sa mga utokan nga engineer sa DPWH aron makasabot ang katawhan sa kamahinungdanon sa inyo’ng proyekto nga gigastohan og kuwarta sa katawhan.

Diha’ng dapit mas bentaha tingali nga ang tubig adto ipalusot sa Lahug River kilid sa taytayan sa Sudlon ug ang imbornal anha ipaagi daplin sa Gorordo Avenue.

Apan kay sila man maoy mga engineer, ibutang na lang nato nga mas utokan sila niini’ng mao nga isyu. Ang gikuyawan lang nako nga mausik lang ang atong kuwarta.

Duna man go’y ubang mga opisyal nga basta nay proyekto nga mahimo maayo na kaayo. Nahibalo na kamo kun ngano. Gawas nga nakahasol sa pag-agi sa mga sakyanan ang mao nga proyekto, maisip ra kini nga wala’y kapuslanan kay mapuno ra gihapon ni sa mga lapok.

Daghan kaayo nga mga proyekto nga gihimo sa pinataka nga paagi. Tan-awa ra gud ang mga drainage projects diha sa dalan Colon ug ubang mga dapit? Resulta, makita nimo nga wala kapusli ug ang gihimo nga drainage system napuno lang sa lapok.

Pait kaayo ang nahitabo kay ang imbornal napuno gihapon sa lapok samtang ang bulsa sa mga mapahimuslanon, napuno ‘sab sa komisyon.